ભારત-અમેરિકા સંયુક્ત લશ્કરી કવાયત 'ટાઈગર ટ્રાયમ્ફ ૨૦૨૬' સંપન્ન

પીઆઈબી દિલ્હીના અહેવાલ મુજબ, ભારત અને અમેરિકા વચ્ચેની પાંચમી દ્વિપક્ષીય ટ્રાય-સર્વિસ હ્યુમેનિટેરિયન અસિસ્ટન્સ એન્ડ ડિઝાસ્ટર રિલીફ યાની કે એચએડીઆર કવાયત 'ટાઈગર ટ્રાયમ્ફ ૨૦૨૬'નું વિશાખાપટ્ટનમ ખાતે ૦૫ નવેમ્બર ૨૦૨૬ના રોજ સમાપન સમારોહ સાથે પૂર્ણ થઈ છે.

આ કવાયત ૩૧ ઓક્ટોબરથી ૦૫ નવેમ્બર ૨૦૨૬ દરમિયાન યોજાઈ હતી, જેમાં બંને દેશોના સશસ્ત્ર દળોના જવાનોએ ભાગ લીધો હતો. આ અભ્યાસમાં સ્ટાફ એક્સરસાઇઝ અને ટેબલટોપ એક્સરસાઇઝનો સમાવેશ થતો હતો. કવાયતનો મુખ્ય હેતુ સંયુક્ત એમ્ફિબિયસ ઓપરેશન્સ પર વિશેષ ભાર મૂકીને સંયુક્ત એચએડીઆર ઓપરેશન્સના આયોજન અને સંચાલનમાં પરસ્પર સુમેળ વધારવાનો તથા પરસ્પર સમજ મજબૂત કરવાનો હતો.

સ્ટાફ એક્સરસાઇઝમાં ઓપરેશનલ આયોજન, શૈક્ષણિક વ્યાખ્યાનો અને સાયબરસ્પેસ તથા તબીબી ઓપરેશન્સ જેવા સમકાલીન ક્ષેત્રો પર સબ્જેક્ટ મેટર એક્સપર્ટ એક્સચેન્જીસ યોજાયા હતા, જેનાથી વ્યાવસાયિક કુશળતા અને શ્રેષ્ઠ પ્રથાઓનું આદાનપ્રદાન સરળ બન્યું હતું. જ્યારે ટેબલટોપ એક્સરસાઇઝે સહભાગી દળોને સિમ્યુલેટેડ ઓપરેશનલ વાતાવરણમાં આયોજનો લાગુ કરવા સક્ષમ બનાવ્યા હતા.

સમાપન સમારોહમાં ઈસ્ટર્ન ફ્લીટના ફ્લેગ ઓફિસર કમાન્ડિંગ રિયર એડમિરલ વિશાલ બિશ્નોઈ અને યુએસ પેસિફિક ફ્લીટના વાઈસ કમાન્ડર રિયર એડમિરલ જોઆક્વિન જે. માર્ટિનેઝ ડે પિનિલોસ તેમજ બંને પક્ષના વરિષ્ઠ અધિકારીઓ ઉપસ્થિત રહ્યા હતા.

પ્રથમ વખત ૨૦૧૯માં યોજાયેલી આ કવાયત ભારત અને અમેરિકા વચ્ચે દ્વિપક્ષીય રક્ષણાત્મક સહયોગ વધારે છે. વર્ષ ૨૦૨૬ની આવૃત્તિની સફળ સમાપ્તિ સંયુક્ત ક્ષમતાઓ વધારવા અને ઇન્ડો-પેસિફિક ક્ષેત્રમાં શાંતિ, સ્થિરતા તથા સુરક્ષામાં ફાળો આપવા બંને રાષ્ટ્રોની પ્રતિબદ્ધતા પુનઃ પુષ્ટ કરે છે.