બનાસકાંઠાની ગૌશાળામાં શંકાસ્પદ ફૂડ પોઇઝનિંગથી ૪૪ ગાયોના મોત

સંદેશના અહેવાલ મુજબ વાવ-થરાદ જિલ્લાના રાહ તાલુકાના ચાંગડા ગામમાં આવેલી ધરણીધર ગૌશાળામાં શંકાસ્પદ ફૂડ પોઇઝનિંગ થવાના કારણે ૪૪ ગાયોના મોત નીપજ્યા છે. આ ગૌશાળામાં ૮૦ કરતા વધુ ગાયો ફૂડ પોઇઝનિંગથી પ્રભાવિત થઈ હોવાની શંકા વ્યક્ત કરવામાં આવી હતી. પ્રાથમિક અનુમાન મુજબ ગૌવંશ લીલું મકાઈનું ઘાસ ખાધા પછી બીમાર પડ્યો હતો.

ઘટનાની જાણ થતા જ પશુ ચિકિત્સકોની ટીમ તાત્કાલિક સ્થળ પર દોડી આવી હતી અને આ ટીમની ભારે જહેમતથી ૩૫ કરતા વધુ ગાયોના જીવ બચાવી લેવામાં સફળતા મળી હતી. મોટી સંખ્યામાં ગૌવંશના આકસ્મિક મૃત્યુના પગલે ગૌશાળાના ટ્રસ્ટીઓમાં ચિંતાનું વાતાવરણ છવાઈ ગયું છે.

આ દુર્ઘટનાને કારણે ગૌ પ્રેમીઓમાં ભારે શોક વ્યાપી ગયો હતો અને મોટી સંખ્યામાં લોકો ગૌશાળા ખાતે એકઠા થયા હતા. ઉપસ્થિત લોકો દ્વારા તમામ મૃત ગાયોને એકસાથે દફનાવવામાં આવી હતી. ગૌશાળામાં બનેલી આ ગંભીર ઘટનાને લઈને સ્થાનિક સ્તરે અને ગૌ પ્રેમીઓમાં ભારે દુઃખની લાગણી જોવા મળી રહી છે.