શેવમોગામાં શેરડીના ખેડૂતોએ સરકાર સામે વિરોધ પ્રદર્શન કર્યું

કર્ણાટકના શેવમોગામાં મંગળવારના રોજ શેરડીના ખેડૂતોએ રાજ્ય સરકાર સામે વિરોધ પ્રદર્શન કર્યું હતું. સ્ટેટ સુગરકેન ગ્રોઅર્સ કોઓર્ડિનેશન કમિટીના બૅનર હેઠળ એકઠા થયેલા ખેડૂતોએ ડેપ્યુટી કમિશનરની કચેરી સામે આ આંદોલન કર્યું હતું અને મુખ્યમંત્રીને સંબોધીને એક યાદી પણ સુપરત કરી હતી. ખેડૂતોએ સરકારને શેરડી માટે નફાકારક ભાવ નક્કી કરવા વિનંતી કરી હતી.

ધ હિન્દુના અહેવાલ મુજબ, ઉત્તર કર્ણાટકના શેરડીના ખેડૂતો એક મહિનાથી વધુ સમયથી આ આંદોલન કરી રહ્યા છે. ખેડૂતોએ જણાવ્યું હતું કે સરકાર, ફેક્ટરી માલિકો અને કોઓર્ડિનેશન કમિટી વચ્ચે ભાવ અંગેની ચર્ચાઓ નિષ્ફળ ગઈ છે. આ દરમિયાન અગાઉના અભૂતપૂર્વ દુષ્કાળને કારણે ખેતરોમાં પાક સુકાઈ રહ્યો છે. ખેડૂતોએ કેન્દ્ર અને રાજ્ય સરકારોને એકબીજા પર દોષારોપણ કરવાનું બંધ કરી તરત જ પ્રતિ ટન ₹૫,૫૦૦નો ભાવ નક્કી કરવા જણાવ્યું હતું.

આંદોલનકારીઓએ ફેક્ટરીઓને તાત્કાલિક શેરડી દળવાનું કામ શરૂ કરવા વિનંતી કરી હતી. સાથે જ, ખેડૂતોએ સરકારને દુષ્કાળગ્રસ્ત ખેડૂતોને યુદ્ધના ધોરણે મદદ કરવા માટે પણ અપીલ કરી હતી. આ વિરોધ પ્રદર્શનનું નેતૃત્વ કર્ણાટક રાજ્ય રૈતા સંઘના નેતાઓ રાઘવેન્દ્ર, જગદીશ, ટી.એમ. ચંદ્રપ્પા અને અન્ય લોકોએ કર્યું હતું. ખેડૂતોએ સરકાર તેમની માંગણીઓ વહેલી તકે પૂરી કરે તે માટે સૂત્રોચ્ચાર પણ કર્યા હતા.

બીજી તરફ, રાજકોટના ઓર્ગેનિક ખેડૂતો પણ મુશ્કેલીમાં છે. ટાઈમ્સ ઓફ ઈન્ડિયાના અહેવાલ મુજબ, રાજકોટમાં દુષ્કાળના કારણે ઓર્ગેનિક ઉત્પાદનમાં ઘટાડો થયો છે. આ પરિસ્થિતિમાં 'ફેમિલી ફાર્મર્સ' પાક નિષ્ફળ જવાને કારણે ઉત્પાદન ઘટાડવા અને ગ્રાહકોને ના પાખવા માટે મજબૂર બન્યા છે.