એસટી બસ સ્ટેન્ડ હત્યાકાંડના મુખ્ય સાક્ષીનું અપહરણ કરી ત્રણ દિવસ સુધી રાખ્યો

ભાવનગરના એસટી બસ સ્ટેન્ડ વિસ્તારમાં થોડા સમય પહેલાં એક યુવતીની હત્યા કરવામાં આવી હતી. આ હત્યાકાંડના મુખ્ય સાક્ષી રવિ ઉર્ફે બાડો રાજુભાઈ સોલંકીનું હત્યાના મુખ્ય આરોપીના પરિવારજનો દ્વારા અપહરણ કરવામાં આવ્યું હોવાની ચોંકાવનારી ઘટના સામે આવી છે. આરોપી ફૈઝલના ભાઈ અને તેની માતાએ સાક્ષીનું અપહરણ કરી તેને ત્રણ દિવસ સુધી ઘરમાં કેદ રાખ્યો હતો.

સંદેશના અહેવાલ મુજબ, જેલમાં રહેલા મુખ્ય આરોપી ફૈઝલ દ્વારા ફોન પર સાક્ષીને કોર્ટમાં તેની વિરુદ્ધ જુબાની ન આપવા માટે ધમકી આપવામાં આવી હતી. આ દરમિયાન, જ્યારે કોર્ટમાંથી નીકળેલું સમન્સ બજાવવા માટે પોલીસ રવિની શોધખોળ કરી રહી હતી, ત્યારે પોલીસ અપહરણ કરનાર માતા અને પુત્રના ઘરે પહોંચી હતી. પોલીસની હાજરી જોઈને અને પોલીસના ડરથી રવિને મુક્ત કરવામાં આવ્યો હતો.

આ સમગ્ર મામલે છૂટેલા મુખ્ય સાક્ષી રવિ ઉર્ફે ભાડો રાજુભાઈ સોલંકીએ નિલમબાગ પોલીસ મથકમાં દીડુ લાખાણી અને શહેનાઝબેન રફીકભાઈ લાખાણી વિરુદ્ધ અપહરણ અને ધમકી આપવા બદલ સત્તાવાર ફરિયાદ નોંધાવી છે. રવિભાઈ વડવા જૂની એસબીઆઈ બેન્ક પાસે આવેલા કિશન ફ્લેટમાં રહેતા હતા અને હાલ એસટી બસ સ્ટેન્ડ વિસ્તારમાં રહે છે.

ફરિયાદમાં જણાવ્યા અનુસાર, ફૈઝલ ઉર્ફે ખાટકી રફીકભાઈ લાખાણીએ ગત ૩ સપ્ટેમ્બરના રોજ શહેરના એસટી બસ સ્ટેન્ડ પાસે તેની માનેલી બહેન કાજલબેનની હત્યા કરી હતી. આ કેસમાં રવિ ઉર્ફે બાડોની કોર્ટમાં મુદત હતી. આરોપીના પરિવારજનો ઈચ્છતા હતા કે રવિ કોર્ટમાં હાજર ન રહે અને ફૈઝલ વિરુદ્ધ જુબાની ન આપે. આ હેતુથી ૨૪ ઓક્ટોબરના રોજ પાનવાડી વિસ્તારમાં નાસ્તો કરતી વખતે રવિનું રીક્ષામાં બેસાડીને અપહરણ કરવામાં આવ્યું હતું અને તેને ત્રણ દિવસ સુધી ઘરમાં રાખવામાં આવ્યો હતો.