બોડેલી પંથકમાં માટીના કોડિયાનું સ્થાન હવે રંગબેરંગી ફાઇબરના દીવડા લઈ રહ્યા છે

બોડેલી તાલુકાના જબુગામ પંથકમાં દિવાળીના પર્વ દરમિયાન બજારમાં ખરીદીનો ભારે માહોલ જોવા મળી રહ્યો છે. જોકે, આ વર્ષે પરંપરાગત માટીના કોડિયા અને દીવડાના સ્થાને રંગબેરંગી ફાઇબરના આકર્ષક દીવડાઓનું વળગણ વધ્યું છે. ફાઇબરના દીવડાઓના વધતા ક્રેઝને કારણે હજારો વર્ષોથી ચાલી આવતી માટીના દીવડાઓની પરંપરા અને તેનું મહત્વ ક્રમશઃ ઓસરી રહ્યું છે.

સંદેશના અહેવાલ મુજબ, આ પરિવર્તનને કારણે બોડેલી તાલુકામાં માટીકામ કરતા કલાત્મક કારીગરોની રોજગારી પર બેકારીની તલવાર લટકતી દેખાઈ રહી છે. જબુગામના કુંભારવાડામાં રહેતા અનુભવી કારીગર નટુભાઈ પ્રજાપતિ દરરોજ ચાકડા પર બેસીને ૧૫૦ થી ૩૦૦ની સંખ્યામાં દીવડા, કુલડી અને કોડિયા બનાવે છે. તેઓ માટીમાંથી વસ્તુઓ બનાવી, દોરીથી કાપી, નિભાળામાં પકવી અને રંગકામ કરીને તૈયાર કરે છે. તેમ છતાં, તેઓ માંડ રોટલા ભેગા થાય તેટલું જ કમાઈ શકે છે.

કારીગરો માટે માટીની અછત પણ એક મોટી સમસ્યા બની છે. હવે માટી બહારથી મંગાવવી પડતી હોવાથી તેની ઘડામણ સોના કરતા પણ મોંઘી પડે છે. વધુમાં, પ્રજાપતિનો આ કલા વારસો તેમના દીકરાઓ શીખવા તૈયાર નથી, જેના કારણે આ ગૃહ ઉદ્યોગ હવે મૃતપ્રાય અવસ્થામાં આવી ગયો છે.