અમદાવાદમાં રોડ પર ગાડીઓ ઊભી રાખી કેક કાપનાર ભાજપ નેતા સામે ગુનો નોંધાયો

સંદેશના અહેવાલ મુજબ, અમદાવાદના નરોડા વિસ્તારમાં જાહેરમાં ટ્રાફિક અને સ્વચ્છતાના નિયમોને નેવે મૂકીને જન્મદિવસની ઉજવણી કરવાનો મામલો સામે આવ્યો છે. શહેરના ભાજપ યુવા મોરચા (BJYM) સરદારનગર વોર્ડના મહામંત્રી રમેશ ભરવાડ ઉર્ફે બંભા અને તેના સમર્થકો દ્વારા કિશોર ઠાકોરના જન્મદિન નિમિત્તે મોડી રાત્રે આ ઉજવણી કરવામાં આવી હતી.

આ ઘટના ગત ૫ નવેમ્બરના રોજ મોડી રાત્રે નરોડા વિસ્તારમાં આવેલા સંવેદનશીલ ૧૦૮ ઇમરજન્સી કોલ સેન્ટરની બરાબર સામેના મુખ્ય જાહેર માર્ગ પર બની હતી. રમેશ ભરવાડ અને તેના સાથીદારો લક્ઝુરિયસ ગાડીઓનો કાફલો લઈને કિશોર ઠાકોરનો જન્મદિવસ મનાવવા માટે ત્યાં પહોંચ્યા હતા. મુખ્ય રસ્તાની બરાબર વચ્ચે અંદાજે ૭ જેટલી કારો થંભાવી દેવામાં આવી હતી, જેના કારણે રસ્તો સંપૂર્ણપણે બ્લોક થઈ ગયો હતો.

આ ગાડીઓની બોનેટ અને છત ઉપર કેક મૂકીને કાપવામાં આવી હતી. આ દરમિયાન જાહેરમાં ફટાકડા પણ ફોડવામાં આવ્યા હતા, જેનાથી ભારે ઘોંઘાટ થયો હતો અને રસ્તા પર કચરો ફેલાઈને ગંદકી થઈ હતી. આ પ્રકારની બેજવાબદાર ઉજવણીના કારણે સામાન્ય રાહદારીઓ તેમજ ઇમરજન્સી વાહનોની અવરજવર માટે જોખમ ઊભું થયું હતું અને જાહેર શાંતિ પણ જોખમાઈ હતી.

ઘટના સ્થળે પોલીસ પીસીઆર વાન આવી પહોંચતા જ આ તમામ ટોળું પોતાની કારો લઈને અંધારામાં ફરાર થઈ ગયું હતું. આ બનાવ અંગે નરોડા પોલીસે ભાજપના નેતા રમેશ ભરવાડ તેમજ કિશોર ઠાકોર અને અન્ય ૬ કાર માલિકો સહિત કુલ ૭ કાર ચાલકો વિરુદ્ધ ગુનો નોંધ્યો છે. આ તમામ સામે જાહેર માર્ગ પર અડચણ ઊભી કરવા, ગંદકી ફેલાવવા, જાહેર શાંતિનો ભંગ કરવા અને લોકોના જીવનને જોખમમાં મૂકતો ઉપદ્રવ મચાવવા બદલ એફઆઈઆર દાખલ કરવામાં આવી છે.

પોલીસે આ ગેરકાયદે ઉજવણીમાં સામેલ તમામ વાહનોના નંબર શોધી કાઢવા માટે આસપાસના સીસીટીવી ફૂટેજ કબજે કરી લીધા છે. તેમજ આ વાહનોના ચાલકો સામે કાયદાનો ગાળિયો વધુ કડક કરવા માટેની આગળની કાર્યવાહી પણ હાથ ધરવામાં આવી છે. તપાસ દરમિયાન રમેશ ભરવાડની જીજે ૧૮ ઈસી ૮૫ નંબરની ફોર્ચ્યુનર કાર આ ગેરકાયદે પાર્ટીમાં સામેલ હોવાનું અને તે પોતે પણ સ્થળ પર હાજર હોવાનું પૂરવાર થયું છે.