નાગલાના ૩૭૧ પરિવારોને પ્લોટની સનદ મળી ખુશીની લહેર

વાવ-થરાદ જિલ્લાના નાગલા ગામના ૩૭૧ લાભાર્થી પરિવારોને તેમના ઘરના પ્લોટની સનદોનું વિતરણ કરવામાં આવ્યું છે. આ કાર્યક્રમ જિલ્લા વિકાસ અધિકારી કલ્પેશ શર્માના અધ્યક્ષસ્થાને યોજાયો હતો, જેનાથી ગ્રામજનોની લાંબી પ્રતીક્ષાનો અંત આવ્યો છે.

નાગલા ગામમાં પુનર્વસનની પ્રક્રિયા વર્ષ ૨૦૧૬-૧૭થી શરૂ થઈ હતી, પરંતુ જમીન અને વહીવટી મંજૂરીઓની જટિલતાઓને કારણે આ મામલો વર્ષો સુધી અટવાયેલો રહ્યો હતો. આ સમસ્યાના ઉકેલ માટે ગુજરાત વિધાનસભાના અધ્યક્ષ અને થરાદના ધારાસભ્ય શંકર ચૌધરીએ અંગત રસ લઈ સતત ફોલોઅપ લીધો હતો. તેમના પ્રયાસોને કારણે તા. ૧૩/૦૮/૨૦૨૩ના રોજ રાજ્ય સરકાર દ્વારા આ યોજનાને અંતિમ મંજૂરી મળી હતી. ત્યારબાદ વહીવટી તંત્ર દ્વારા કાયદાકીય પ્રક્રિયાઓ ઝડપથી પૂર્ણ કરવામાં આવી હતી.

ગામના સરપંચ દેવશી પટેલે જણાવ્યું હતું કે, એક જ દિવસમાં આટલી મોટી સંખ્યામાં પરિવારોને સનદો આપીને નેતૃત્વ અને વહીવટી તંત્રએ સમગ્ર ગુજરાતમાં પ્રેરણારૂપ ઉદાહરણ પૂરું પાડ્યું છે. તેમણે ગરીબ પરિવારોને માથે છત અપાવવાનું આ કાર્ય શંકર ચૌધરીના પ્રયાસોથી શક્ય બન્યું હોવાનું કહ્યું હતું. આ પ્રસંગે આગેવાન જીવરાજ પટેલે બાકી રહેલા લાભાર્થીઓની પ્રક્રિયા વહેલી તકે પૂર્ણ કરવા અને પુનર્વસન વિસ્તારમાં રોડ, રસ્તા તથા પાણી જેવી પ્રાથમિક સુવિધાઓ ઝડપથી પૂરી પાડવાની ખાતરી આપી હતી.

આ પ્રસંગે તાલુકા વિકાસ અધિકારી રાજેશ જોશી, સરપંચ દેવશી પટેલ, સરદારસિંહ વાઘેલા, હિતેશ પટેલ સહિતના સ્થાનિક આગેવાનો અને વહીવટી અધિકારીઓ મોટી સંખ્યામાં હાજર રહ્યા હતા.

શંકર ચૌધરી ગુજરાત વિધાનસભાના અધ્યક્ષ અને થરાદના ધારાસભ્ય છે.