લાંબા સમય સુધી રહેતા મોંના છાલા ઓરલ કેન્સરનું મોટું જોખમ બની શકે છે

અમર ઉજાલાના અહેવાલ મુજબ, મોંમાં છાલા થવાની તકલીફ ખૂબ જ સામાન્ય છે અને બાળકોથી લઈને વડીલો સુધી કોઈપણ વ્યક્તિ તેનો ભોગ બની શકે છે. ભૂલથી ગાલ કે જીભ કપાઈ જવી, સખત બ્રિસલવાળા બ્રશનો ઉપયોગ કરવો અથવા તો કેટલાક કિસ્સાઓમાં વિટામિન બી-૧૨ અને ફોલેટની ઉણપને કારણે લોકોને આ મુશ્કેલી થતી હોય છે. સામાન્ય રીતે આ છાલા પોતાની મેળે કે પછી હળવા ઉપચારથી મટી જતા હોય છે, પરંતુ જો તમારા મોંમાં આ તકલીફ વારંવાર થતી હોય કે છાલાને મટવામાં ખૂબ લાંબો સમય લાગતો હોય, તો તેને નજરઅંદાજ કરવાની ભૂલ ન કરવી જોઈએ. ક્યારેક મોંમાં લાંબા સમય સુધી રહેતો છાલો કેન્સરનો પ્રારંભિક સંકેત પણ સાબિત થઈ શકે છે.

ચિંતાજનક બાબત એ છે કે હવે યુવા વર્ગમાં પણ મોંના કેન્સરના કેસો ખૂબ જ ઝડપથી વધી રહ્યા છે. આ ગંભીર બીમારી જીભ, મસૂડાં, હોઠ અને ગાલના અંદરના ભાગને પ્રભાવિત કરી શકે છે. સ્વાસ્થ્ય વિશેષજ્ઞોના જણાવ્યા અનુસાર, જો મોંમાં કોઈ છાલો ત્રણ સપ્તાહ સુધી મટતો ન હોય અથવા કોઈ અસામાન્ય ગાંઠ, સોજો કે પછી સફેદ-લાલ નિશાન જોવા મળે, તો તેની તાત્કાલિક તપાસ કરાવવી અનિવાર્ય છે. ઓરલ કેન્સરના વધતા જતા કેસોને ધ્યાનમાં રાખીને સ્વાસ્થ્ય વિશેષજ્ઞોએ તમામ નાગરિકોને અપીલ કરી છે કે તેઓ નિયમિતપણે પોતાના મોંની તપાસ કરે અને કેન્સરના પ્રારંભિક સંકેતોને ઓળખવાનો પ્રયાસ કરે.

ખાસ કરીને છેલ્લા ૨૦ વર્ષમાં ઓરલ કેન્સરના કેસોમાં બમણાથી પણ વધુ વધારો નોંધાયો છે. આશ્ચર્યજનક રીતે ૫૦ વર્ષથી ઓછી વંયના લોકોમાં પણ તેના લક્ષણો સામે આવી રહ્યા છે. ઓરલ હેલ્થ ફાઉન્ડેશનના અભ્યાસ પરથી એવો ખુલાસો થાય છે કે આ બીમારીના કેસો વધવા છતાં લોકોમાં તેના પ્રારંભિક લક્ષણોને લઈને જાગરૂકતા હજુ સુધી પૂરતી વધી નથી. ઓરલ હેલ્થ ફાઉન્ડેશનની અધ્યક્ષ અને રજિસ્ટર્ડ ડેન્ટિસ્ટ કેથરિન બ્રેડીનું કહેવું છે કે મોંમાં છાલો, કોઈ પ્રકારનું નિશાન કે ગાંઠ થવા પર લોકો અક્ષર તેને સામાન્ય સમસ્યા સમજીને અવગણી નાખે છે. ખાસ કરીને જ્યારે તેમાં દર્દ ન થતું હોય ત્યારે લોકોનું ધ્યાન તેના પર જતું નથી. પરંતુ જો મોંમાં કોઈ પણ પ્રકારનો બદલાવ ત્રણ સપ્તાહથી વધુ સમય સુધી ટકી રહે, તો ડોક્ટર પાસે તેની તપાસ કરાવવી અત્યંત જરૂરી છે.

સ્વાસ્થ્ય વિશેષજ્ઞોનું માનવું છે કે મોંનું કેન્સર કોઈપણ વ્યક્તિને થઈ શકે છે. અન્ય ગંભીર બીમારીઓની જેમ જ ઓરલ કેન્સરના કિસ્સામાં પણ સમયસર ઓળખ થવી ખૂબ જ મહત્વપૂર્ણ ભૂમિકા ભજવે છે. બીમારી જેટલી વહેલી પકડમાં આવે છે, તેના ઉપચારના સફળ થવાની સંભાવના પણ તેટલી જ વધારે સારી રહે છે. બ્રિટનની સ્થાનિક મીડિયામાં પ્રકાશિત થયેલા એક અહેવાલમાં કરેન લિશિંગ-શ્રોડર નામની એક મહિલાએ પોતાના અનુભવો શેર કરતા જણાવ્યું હતું કે તેમણે શરૂઆતમાં પોતાના લક્ષણોને નજરઅંદાજ કરી દીધા હતા અને બાદમાં તેમને ખબર પડી કે તેઓ જીભના કેન્સરથી પીડિત છે. શરૂઆતના તબક્કામાં તેમની જીભ પર એક નાનો છાલો થયો હતો.

ઓરલ હેલ્થ ફાઉન્ડેશન એ એક અગ્રણી સંસ્થા છે જે મોંના સ્વાસ્થ્ય અને ઓરલ કેન્સર અંગે લોકોમાં જાગરૂકતા ફેલાવવાનું કાર્ય કરે છે. આ સંસ્થા દ્વારા સમયાંતરે અભ્યાસો હાથ ધરવામાં આવે છે જેથી ઓરલ કેન્સરના વધતા જતા જોખમ અને તેના પ્રારંભિક લક્ષણો વિશે વૈશ્વિક સ્તરે જાગૃતિ લાવી શકાય.