મેલાનિયા ટ્રમ્પના પ્રયાસથી યુક્રેનમાં સ્થાનિક યુદ્ધવિરામ અમલમાં આવ્યો

અમેરિકાના ફર્સ્ટ લેડી મેલાનિયા ટ્રમ્પ દ્વારા મધ્યસ્થી કરવામાં આવેલા માનવતાવાદી મિશનના ભાગરૂપે રશિયા અને યુક્રેન વચ્ચે મંગળવારે વહેલી સવારે સ્થાનિક યુદ્ધવિરામ અમલમાં આવ્યો છે. NPR ના અહેવાલ મુજબ, દક્ષિણ યુક્રેનના રશિયન કબજા હેઠળના ઓલેસ્કી શહેરમાં આ અઠવાડિયે સહાય પહોંચાડવા માટે સવારે ૩ વાગ્યાથી લડાઈમાં વિરામ આપવામાં આવ્યો છે.

મેલાનિયા ટ્રમ્પના કાર્યાલયના જણાવ્યા અનુસાર, તેમણે સંયુક્ત રાષ્ટ્રના અધિકારીઓ સાથે મુલાકાત કરી અને ત્યારબાદ રશિયા તથા યુક્રેનના નાગરિક વાટાઘાટકારો સાથે ચર્ચા કરી હતી. યુએન મુજબ, ઓલેસ્કીમાં અંદાજે ૨,૦૦૦ લોકો ફસાયેલા છે, જ્યાં ખોરાક અને દવાઓની અછત સર્જાઈ છે. વિસ્ફોટક માઈન અને ડ્રોન હુમલાઓને કારણે તેઓ ત્યાંથી નીકળી શકતા નથી. આ મિશન હેઠળ ડૉક્ટરો, દવાઓ, ખોરાક અને પાણી પહોંચાડવાનું આયોજન છે.

આ યુદ્ધવિરામ શનિવાર સુધી અથવા તેનાથી વધુ સમય માટે હોઈ શકે છે. જોકે, આ દરમિયાન કિવમાં મિસાઈલ હુમલાઓ ફરી શરૂ થયા હતા. શહેરના અધિકારીઓના જણાવ્યા અનુસાર, રશિયન બેલિસ્ટિક મિસાઈલ હુમલામાં એક વ્યક્તિના મોત થયા છે અને ૧૦ લોકો ઘાયલ થયા છે. ખાર્કિવમાં પણ હુમલામાં બે લોકોના મોત થયા છે અને ચાર ઘાયલ થયા છે. યુક્રેનના રાષ્ટ્રપતિ વોલોડિમીર ઝેલેન્સ્કીએ જણાવ્યું છે કે રશિયા યુદ્ધ ચાલુ રાખવાની ઈચ્છા ધરાવે છે.