સુરતની લાજપોર જેલમાં એક મહિનામાં ૨૫ મોબાઈલ મળી આવ્યા

સુરતની લાજપોર મધ્યસ્થ જેલમાં મોબાઈલ મળી આવવાનો સિલસિલો સતત જારી રહ્યો છે. છેલ્લા એક મહિનાના સમયગાળામાં જેલમાંથી અંદાજે ૨૫ જેટલા મોબાઈલ અને ચાર્જર જેવી વસ્તુઓ મળી આવી છે. સુરક્ષાના દાવાઓ વચ્ચે જેલમાં સતત મળી આવતા આ સાધનોએ જેલ તંત્રની સુરક્ષા વ્યવસ્થા પર ગંભીર પ્રશ્નો ઊભા કર્યા છે.

તાજેતરની ઘટનામાં, ૩૧ ઓક્ટોબરના રોજ સવારે લાજપોર જેલના યાર્ડના સર્કલ ખાતે સુબેદાર વિહા ભાદરકાને સુપરવિઝનની ફરજ સોંપવામાં આવી હતી. સવારના સમયે જ્યારે તેઓ બેરેક પાસે રાઉન્ડ લઈ રહ્યા હતા, ત્યારે એક કાચા કામના કેદીની હિલચાલ શંકાસ્પદ જણાઈ હતી. આથી તેની અંગઝડતી કરવામાં આવી હતી. તપાસ દરમિયાન જાણવા મળ્યું કે કેદીએ પહેરેલા પેન્ટના અંડરવેરના ડાબી બાજુના ખિસ્સામાંથી કેયોડા કંપનીનો એક મોબાઈલ મળી આવ્યો હતો. આ મોબાઈલમાં સિમકાર્ડ નહોતું. આરોપીની ઓળખ દિનેશ ઉર્ફે છોટુ રામખિલાડી યાદવ તરીકે થઈ છે. જેલર શિવકુમાર બામણભાઈ તડવીની ફરિયાદના આધારે સચિન પોલીસે દિનેશ વિરુદ્ધ ગુનો નોંધ્યો છે.

નોંધનીય છે કે, અગાઉ અમદાવાદ-વડોદરાની જેલ ઝડતી સ્કવોડે લાજપોર જેલમાં સરપ્રાઈઝ ચેકિંગ કરીને એકસાથે ૧૧ મોબાઈલ પકડી પાડ્યા હતા. આ ઘટના બાદ જેલમાં ચાલતા વીઆઈપી કલ્ચરનો ભાંડો ફૂટ્યો હતો. આ મામલે ડીજીપી દ્વારા કડક પગલાં લેવામાં આવ્યા હતા, જેમાં જેલના સુબેદાર, હવાલદાર અને સિપાહી સહિતના કર્મચારીઓની ટેન્સ્પેન્ડ કરી દેવા સાથે એક જેલરની બદલી કરવામાં આવી હતી. આ ઉપરાંત કેશિયર ચિરાગ ભગવાડ સહિત ૪ કેદીઓની પણ જેલ ટ્રાન્સફર કરવામાં આવી હતી.

છેલ્લા એક મહિનામાં ૨૫ મોબાઈલ મળી આવ્યા હોવા છતાં જેલમાં મોબાઈલ, પાન-મસાલા અને સિગારેટ કેવી રીતે પહોંચે છે તેનો કોયડો હજુ ઉકેલાયો નથી. જેલ તંત્ર દ્વારા એક્શનના નામે માત્ર નાના કેદીઓ સામે કાર્યવાહી કરીને મોટા ગુનેગારોને બચાવવામાં આવી રહ્યા હોવાની ચર્ચા પણ થઈ રહી છે. વગદાર કેદીઓ દ્વારા જેલની બદનામી કરવામાં આવી રહી હોવાથી અધિકારીઓ પર પણ કડક શિક્ષાત્મક પગલાં લેવાની માંગ ઉઠી છે.