વંદે માતરમ પ્રોટોકોલના ઉલ્લંઘન બદલ બીજેપીએ કસરાગોડ કલેક્ટરને નિશાન બનાવ્યા

કેરળના કસરાગોડમાં એક સત્તાવાર કાર્યક્રમ દરમિયાન રાષ્ટ્રીય ગીત 'વંદે માતરમ' પૂર્ણ થયા પહેલા કેટલાક મહાનુભાવો બેસી ગયા હતા, જેને લઈને હવે મોટો વિવાદ સર્જાયો છે. આ ઘટના બાદ ભારતીય જનતા પાર્ટીએ (બીજેપી) કસરાગોડ જિલ્લા કલેક્ટર શ્રીધન્યા સુરેશ સામે આકરા પ્રહારો કર્યા છે. બીજેપીનો આરોપ છે કે આઈએએસ અધિકારી શ્રીધન્યા સુરેશે રાષ્ટ્રીય પ્રોટોકોલનું ઉલ્લંઘન કર્યું છે, કારણ કે તેઓ વંદે માતરમના પ્રથમ બે અંતરા ગાયા પછી બેસી ગયા હતા, જ્યારે બાકીના અંતરા હજુ ગાવામાં આવી રહ્યા હતા.

એનડીટીવીના અહેવાલ મુજબ, આ સમગ્ર ઘટના કસરાગોડના મુલિયર ફેમિલી હેલ્થ સેન્ટર ખાતે એક લેબોરેટરીના ઉદઘાટન પ્રસંગે બની હતી. આ કાર્યક્રમ દરમિયાન વંદે માતરમ ગાવામાં આવ્યું હતું. ઉપલબ્ધ વીડિયો ફૂટેજમાં જોઈ શકાય છે કે કેરળના મંત્રી કે. મુરલીધરન, સાંસદ રાજમોહન ઉન્નીથન, ધારાસભ્ય કે. મહિન અને જિલ્લા કલેક્ટર શ્રીધન્યા સુરેશ પ્રથમ બે અંતરા પૂરા થયા બાદ પોતાની સીટ પર બેસી ગયા હતા. બીજી તરફ, ધારાસભ્ય કે. નીલકંદન અને ડીસીસી પ્રમુખ પી. કે. ફૈઝલ ગીત પૂર્ણ ન થાય ત્યાં સુધી ઉભા રહ્યા હતા.

વીડિયોમાં એવું પણ જોવા મળે છે કે જ્યારે ગીતના બાકીના અંતરા ગાવામાં આવી રહ્યા હતા, ત્યારે મંત્રી કે. મુરલીધરન સ્ટેજ પર અન્ય લોકો સાથે વાતચીત કરી રહ્યા હતા. આ ઘટનાએ રાજકીય રંગ ધારણ કર્યો છે અને બીજેપીએ આ બાબતે કડક કાર્યવાહી કરવાની જાહેરાત કરી છે. બીજેપીએ જણાવ્યું છે કે તેઓ આ મામલે કેન્દ્રીય ગૃહમંત્રી અમિત શાહ, કેરળના રાજ્યપાલ અને રાજ્ય સરકારનો સંપર્ક કરશે અને જિલ્લા કલેક્ટર સામે કડક પગલાં લેવાની માંગ કરશે.

બીજેપીના કસરાગોડ જિલ્લા પ્રમુખ અશ્વિની એમ.એલ. એ આ ઘટના પર રોષ વ્યક્ત કરતા કહ્યું હતું કે, "કલેક્ટરે કેન્દ્ર સરકારના પ્રોટોકોલનું પાલન કરવું પડે છે, તે ઉભા ન રહ્યા તે અત્યંત દુખદ અને આઘાતજનક છે." બીજેપીએ મંત્રીના બચાવના તર્કને નકારી કાઢતા ખાસ કરીને જિલ્લા કલેક્ટરને નિશાન બનાવ્યા છે.

બીજી તરફ, મંત્રી કે. મુરલીધરને પોતાની દલીલો રજૂ કરતા કહ્યું હતું કે સત્તાવાર કાર્યક્રમની અનુસૂચિમાં 'વંદે માતરમ'નો કોઈ ઉલ્લેખ કરવામાં આવ્યો ન હતો. તેમણે જણાવ્યું કે પ્રોગ્રામમાં માત્ર 'ઈશ્વર પ્રાર્થના' અથવા આહ્વાન ગીતનો જ ઉલ્લેખ હતો અને વંદે માતરમનું સંપૂર્ણ સંસ્કરણ રજૂ કરવામાં આવશે તેવી કોઈ પૂર્વ સૂચના આપવામાં આવી ન હતી. પોતાની દેશભક્તિ પર વિશ્વાસ વ્યક્ત કરતા મુરલીધરને કહ્યું, "હું એક સ્વાતંત્ર્ય સેનાનીનો પુત્ર છું. મારે કોઈની સામે મારી દેશભક્તિ સાબિત કરવાની જરૂર નથી."

મંત્રીએ વધુમાં દલીલ કરી હતી કે ગ્રામ પંચાયતની અધિકાર ક્ષેત્ર હેઠળ યોજાયેલા કાર્યક્રમોમાં કેરળ સરકાર દ્વારા નિર્ધારિત પ્રોટોકોલનું પાલન કરવું જોઈએ. તેમણે એવી રજૂઆત કરી કે પ્રોગ્રામમાં વંદે માતરમના તમામ અંતરાનો સમાવેશ કરવાની કોઈ જરૂરિયાત નહોતી અને આહ્વાન વિભાગ હેઠળ સંપૂર્ણ ગીત ગાવાનો નિર્ણય લેવામાં આવ્યો તે અંગે પ્રશ્નો ઉઠાવ્યા હતા. હવે આ મામલે કેન્દ્રીય ગૃહ મંત્રાલય તપાસ કરશે કે કેમ, તે જોવાનું રહેશે.