સેટેલાઇટ નેટવર્ક માટે TRAI એ નવું ફ્રેમવર્ક રજૂ કર્યું

ભારતીય ટેલિકોમ રેગ્યુલેટરી ઓથોરિટી ઓફ ઈન્ડિયા (TRAI) એ સેટેલાઇટ નેટવર્ક પ્રદાતાઓ માટે અલગ ઓથોરાઈઝેશન (અધિકૃતતા) આપવાનો પ્રસ્તાવ મૂક્યો છે. આ નવા ફ્રેમવર્ક હેઠળ, સેટેલાઇટ કંપનીઓ સીધા ગ્રાહકોને ટેલિકોમ સેવાઓ વેચવાને બદલે લાયક ટેલિકોમ ઓપરેટરો અને સેવા પ્રદાતાઓ સાથે નેટવર્ક ક્ષમતા શેર કરી શકશે. આ પ્રસ્તાવ ભારતભરમાં સેટેલાઇટ કમ્યુનિકેશન્સ માટે એક નવું બિઝનેસ મોડલ ખોલી શકે છે.

NDTVના અહેવાલ મુજબ, ૫ નવેમ્બરના રોજ જાહેર કરવામાં આવેલી આ ભલામણોમાં સૂચવવામાં આવ્યું છે કે અધિકૃત કંપનીઓ લાયક સેવા પ્રદાતાઓને 'સેટેલાઇટ કમ્યુનિકેશન નેટવર્ક એઝ અ સર્વિસ' (SCNaaS) પૂરી પાડી શકે છે. TRAI એ સ્પષ્ટતા કરી છે કે આવા પ્રદાતાઓ સીધા વપરાશકર્તાઓને ટેલિકોમ સેવાઓ પૂરી પાડી શકશે નહીં. આ નવું ઓથોરાઈઝેશન હાલના લાયસન્સ ધરાવતા સેટેલાઇટ સેવા પ્રદાતાઓ માટે ગ્રાહકોને સેવા આપવાનો હાલનો માર્ગ છીનવી લેશે નહીં, પરંતુ તેના બદલે ટેલિકોમ ઓપરેટરોને નેટવર્ક ઇન્ફ્રાસ્ટ્રક્ચર સપ્લાય કરવા માટે એક વધારાનો માર્ગ બનાવશે.

આ પ્રસ્તાવિત માળખા હેઠળ સ્ટારલિંક (Starlink), જીઓ સેટેલિટ કમ્યુનિકેશન (Jio Satcom) અને યુટેલસેટ વનવેબ (Eutelsat OneWeb) કાર્યરત થઈ શકે છે. આ ત્રણેય કંપનીઓ પાસે ભારતમાં સેટેલાઇટ આધારિત સેવાઓ પૂરી પાડવા માટે પહેલેથી જ GMPCS અધિકૃતતા છે. જો કે, નવું નેટવર્ક-પ્રદાતા ઓથોરાઈઝેશન તેમના હાલના પરવાનગીઓથી અલગ રહેશે.

TRAI એ સૂચન કર્યું છે કે આ નવા ઓથોરાઈઝેશન સમગ્ર દેશને આવરી લેશે. આ પરવાનગીની મહત્તમ અવધિ ૨૦ વર્ષની રહેશે અને તેને બીજા ૨૦ વર્ષ માટે રિન્યુઅલ (નવીકરણ) કરવાનો વિકલ્પ પણ આપવામાં આવશે. આ ઉપરાંત, સેટેલાઇટ નેટવર્ક પ્રદાતાઓને તેમના ભાગીદાર સેવા પ્રદાતાઓને ફાળવવામાં આવેલ સ્પેક્ટ્રમનો ઉપયોગ કરવાની પણ મંજૂરી આપવામાં આવશે. TRAI મુજબ, અધિકૃત સંસ્થાઓ નેટવર્ક સેવાઓ પૂરી પાડવા માટે કેન્દ્ર સરકાર પાસેથી યોગ્ય સેટેલાઇટ સ્પેક્ટ્રમ (FSS અને MSS) માંગી શકે છે અથવા ભાગીદાર સેવા પ્રદાતાઓને ફાળવવામાં આવેલા સ્પેક્ટ્રમનો ઉપયોગ કરી શકે છે.

આ પ્રસ્તાવ ટેલિકોમ ઓપરેટરોને સેટેલાઇટ કંપનીઓ સાથે 'ડાયરેક્ટ-ટુ-ડિવાઇસ' (D2D) કનેક્ટિવિટી માટે ભાગીદારી કરવા સક્ષમ બનાવી શકે છે. આ ટેકનોલોજીના કારણે એવા વિસ્તારોમાં જ્યાં જમીન પર મોબાઈલ કવરેજ ઉપલબ્ધ નથી, ત્યાં સુસંગત મોબાઈલ ફોન સેટેલાઇટ સાથે સીધા જોડાઈ શકશે.

TRAI એ સેટેલાઇટ કમ્યુનિકેશન ક્ષેત્રના નિયમન માટેના આ નવા માળખા દ્વારા સેટેલાઇટ નેટવર્ક પ્રદાતાઓ માટે નવી તકો ઊભી કરી છે. આ ફ્રેમવર્ક દ્વારા કંપનીઓ ટેલિકોમ ઓપરેટરોને નેટવર્ક ક્ષમતા પૂરી પાડીને તેમની સેવાઓને વધુ વ્યાપક બનાવી શકશે.