પંજાબમાં પ્રથમવાર ઇઝરાયેલિયન ઉઝી સબમશીન ગન અને ૩૪ કિલો હેરોઇન જપ્ત

પંજાબ પોલીસ દ્વારા રાજ્યમાં અત્યાર સુધીની સૌથી મોટી કાર્યવાહી કરવામાં આવી છે, જેમાં પ્રથમ વખત ઇઝરાયેલ બનાવની બે ૯-મીમી ઉઝી (Uzi) સબમશીન ગન જપ્ત કરવામાં આવી છે. અમૃતસર ગ્રામીણ પોલીસ દ્વારા હાથ ધરવામાં આવેલી આ મોટી કાર્યવાહી દરમિયાન આ અત્યાધુનિક હથિયારોની સાથે બે હેન્ડ ગ્રેનેડ પણ મળી આવ્યા છે. આ જપ્તી એક શંકાસ્પદ આતંકવાદી-ગેંગસ્ટર નેટવર્ક સામેની કાર્યવાહીનો ભાગ હતી.

એનડીટીવીના અહેવાલ મુજબ, ૪ નવેમ્બરના રોજ કોટ ખાલસા વિસ્તારમાંથી ત્રણ શંકાસ્પદ વ્યક્તિઓ પાસેથી આ હથિયારો કબજે કરવામાં આવ્યા હતા. આ સમગ્ર ઓપરેશન હેઠળ પોલીસે કુલ ૧૬ આરોપીઓની ધરપકડ કરી છે. હથિયારો ઉપરાંત, પોલીસે ૩૪ કિલોગ્રામ હેરોઇન, પાંચ ગેરકાયદેસર પિસ્તોલ અને ૨૬ જીવંત કારતુસ પણ જપ્ત કર્યા છે.

બોર્ડર રેન્જના ઇન્સ્પેક્ટર જનરલ ઓફ પોલીસ ગુરપ્રીત સિંહ ભુલર યાંની જણાવ્યું હતું કે, "પંજાબમાં પ્રથમ વખત બે અત્યાધુનિક ઇઝરાયેલિયન ઉઝી સબમશીન ગન મળી આવી છે." તેમણે વધુમાં ઉમેર્યું કે આ હથિયારો અત્યંત આધુનિક છે અને તેમની જપ્તી દર્શાવે છે કે ગુનાહિત તત્વો હવે વધુ અદ્યતન શસ્ત્રો મેળવવાનો પ્રયાસ કરી રહ્યા છે.

પોલીસની પ્રાથમિક તપાસમાં જાણવા મળ્યું છે કે ધરપકડ કરાયેલા આરોપીઓ વિદેશમાં બેઠેલા હેન્ડલર્સના સંપર્કમાં હતા. આ વિદેશી હેન્ડલર્સ પંજાબના ગુનાહિત તત્વો સુધી ગેરકાયદેસર હથિયારો પહોંચાડવા માટે મદદ કરી રહ્યા હતા. આઈજી ભુલરના જણાવ્યા અનુસાર, વિદેશી હેન્ડલર્સ તેમના સ્થાનિક સાથીદારોને હથિયારો અને વિસ્ફોટક સામગ્રીનો સંગ્રહ કરવા માટે નિર્દેશો આપી રહ્યા હતા. પોલીસ માને છે કે આ હથિયારો અને વિસ્ફોટકોનો ઉપયોગ આતંકવાદી પ્રવૃત્તિઓ, ટાર્ગેટ કિલિંગ અથવા ગેંગો વચ્ચેની દુશ્મનીમાં કરવામાં આવવાનો હતો.

પંજાબના ડીજીપી (DGP) ઓફિસે સોશિયલ મીડિયા પ્લેટફોર્મ X પર એક પોસ્ટમાં જણાવ્યું હતું કે, અમૃતસર ગ્રામીણ પોલીસે ગેરકાયદેસર હથિયારો, વિસ્ફોટકો અને ડ્રગ્સ ટ્રાફિકિંગના અનેક નેટવર્ક્સનો પર્દાફાશ કર્યો છે. આ સાથે જ પોલીસે બિયાસ, મેહતા અને છેહરતામાં થયેલી ફાયરિંગની ત્રણ મુખ્ય ઘટનાઓને ઉકેલી છે અને ૧૬ આરોપીઓને ઝડપ્યા છે.

હેરોઇનની જપ્તી અંગેની વિગતો આપતા પોલીસે જણાવ્યું કે, ઘરિંડા અને લોપોકે પોલીસ સ્ટેશન વિસ્તારમાં અલગ-અલગ ઓપરેશન દ્વારા કુલ ૩૪ કિલોગ્રામ હેરોઇન મળી આવ્યું છે. જેમાં ૨૯ ઓક્ટોબરના રોજ બે આરોપીઓ પાસેથી ૧૦ કિલોગ્રામ, અન્ય બે શંકાસ્પદો પાસેથી ૧ કિલોગ્રામ, ૩ નવેમ્બરના રોજ બે આરોપીઓ પાસેથી ૧૦.૧૮ કિલોગ્રામ અને લોપોકેમાં જૂના કેસમાં ધરપકડ કરાયેલા એક આરોપી પાસેથી ૧૩ કિલોગ્રામ હેરોઇન જપ્ત કરવામાં આવ્યું હતું.

આ સમગ્ર ઓપરેશન પંજાબ સરકારના ગેંગસ્ટરો અને નશીલા પદાર્થો વિરુદ્ધના અભિયાન હેઠળ હાથ ધરવામાં આવ્યું હતું. આ કાર્યવાહીનું સુપરવિઝન સિનિયર સુપરિન્ટેન્ડન્ટ ઓફ પોલીસ (અમૃતસર ગ્રામીણ) કનવલપ્રીત સિંહ ચહાલ દ્વારા કરવામાં આવ્યું હતું. હાલમાં પોલીસ આ નેટવર્કની કડીઓ જોડવા અને તેમાં સામેલ અન્ય વ્યક્તિઓની ઓળખ કરવા માટે વધુ તપાસ કરી રહી છે.