લશ્કરના આતંકવાદી અબ્દુલ લતીફ ભાટની શોધમાં પોલીસ દ્વારા નવા પોસ્ટર લગાવ્યા

જમ્મુ-કાશ્મીર પોલીસે કાશ્મીરના એકમાત્ર બચેલા સ્થાનિક આતંકવાદીની શોધ માટે નવું અભિયાન શરૂ કર્યું છે. NDTV ના અહેવાલ મુજબ, પોલીસે શ્રીનગરના લાલ ચોક અને પ્રતાપ પાર્ક જેવા વિસ્તારોમાં આતંકવાદીના ફોટા સાથેના પોસ્ટરો લગાવીને શ્રીનગરના લોકોને તેને પકડવામાં મદદ કરવાની અપીલ કરી છે.

લશ્કર-એ-તૈયબાના ઓપરેટિવ અબ્દુલ લતીફ ભાટ, જે મોહમ્મદ લતીફ ભાટ તરીકે પણ ઓળખાય છે, તેની ધરપકડ માટે પોલીસે ચાર મહિના પહેલા ₹૧૫ લાખનું ઇનામ જાહેર કર્યું હતું. આ ઇનામ હજુ પણ યથાવત છે. પોલીસ દ્વારા ફરીથી પોસ્ટરો લગાવવામાં આવ્યા છે જેથી કાશ્મીર ખીણમાંથી આતંકવાદના છેલ્લા નિશાનને પણ સંપૂર્ણપણે ખતમ કરી શકાય.

સુરક્ષા એજન્સીઓએ જનતાને સીધી અપીલ કરી છે કે જો કોઈ વ્યક્તિ પાસે આ આતંકવાદીઓની હાજરી અથવા તેમની હિલચાલ વિશે કોઈ વિશ્વસનીય માહિતી હોય, તો તેમણે આગળ આવવું જોઈએ. અધિકારીઓએ ખાતરી આપી છે કે માહિતી આપનાર વ્યક્તિની ઓળખ સંપૂર્ણપણે ગુપ્ત રાખવામાં આવશે અને તેમને યોગ્ય ઇનામ આપવામાં આવશે.

આ શોધ અભિયાનના કેન્દ્રમાં દક્ષિણ કાશ્મીરના કુલગામ જિલ્લાના રહેવાસી મોહમ્મદ લતીફ ભાટ છે. તે લશ્કર-એ-તૈયબાનો એક કટ્ટર ઓપરેટિવ છે. તેના પર અનંતનાગમાં એક પોલીસ અધિકારીની હત્યા કરવાનું કાવતરું રચવાનો અને જુલાઈ ૨૦૨૬માં સ્થળાંતરિત કામદારોને નિશાન બનાવવાનો ગંભીર આરોપ છે.

પોલીસ દ્વારા લગાવવામાં આવેલા બેનરોમાં માત્ર લતીફ ભાટ જ નહીં, પરંતુ અન્ય ત્રણ વોન્ટેડ આતંકવાદીઓના ફોટા અને વિગતો પણ આપવામાં આવી છે. આ ત્રણેય આતંકવાદીઓ ઉત્તર કાશ્મીરના બારામુલ્લા જિલ્લાના રહેવાસી હોવાનું અલ્યવામા આવ્યું છે. તેમની ઓળખ બિલાલ અહમદ મીર, મોહમ્મદ ઉમર મીર અને આબિદ કયૂમ લોન તરીકે કરવામાં આવી છે. પોલીસના જણાવ્યા અનુસાર, આ ત્રણેય હાલમાં પાકિસ્તાન અધિકૃત જમ્મુ-કાશ્મીર (PoJK) થી કામગીરી કરી રહ્યા હોવાનું માનવામાં આવે છે.

અધિકારીઓએ જણાવ્યું છે કે આ નવી અપીલ કાશ્મીરમાં આતંકવાદી નેટવર્કના અવશેષોને ખતમ કરવાના સંકલિત પ્રયાસોનો એક ભાગ છે. આ અભિયાનનો મુખ્ય ઉદ્દેશ્ય કાશ્મીર ખીણને આતંકવાદના પડછાયાથી મુક્ત રાખવાનો અને સુરક્ષા વ્યવસ્થાને વધુ મજબૂત બનાવવાનો છે. પોલીસ આતંકવાદીઓના તમામ સંપર્કો તોડવા અને તેમને પકડી પાડવા માટે સતત પ્રયત્નશીલ છે.