ભારતીય નૌકાદળ દ્વારા અપહરણ કરાયેલા ઈરાની જહાજમાંથી ૨૦ ક્રૂ સભ્યો બચાવ્યા

ભારતીય નૌકાદળે અરબી સમુદ્રમાં ૪૮ કલાક સુધી ચાલેલા ઓપરેશન દ્વારા ઈરાની માછીમારીના જહાજ 'અઝીની' પરના ૨૦ ક્રૂ સભ્યોને સુરક્ષિત રીતે બચાવી લીધા છે. આ જહાજને ૨૯ ઓક્ટોબરના રોજ સોમાલી ચાંચિયાઓએ પકડી પાડ્યું હતું. અધિકારીઓના જણાવ્યા અનુસાર, આ બચાવ કામગીરી મુંબઈથી ૩,૦૦૦ કિમી દૂર કરવામાં આવી હતી.

એસોસિએટેડ પ્રેસના અહેવાલ મુજબ, અઝીની જહાજનું અપહરણ ઉત્તર-પૂર્વી સોમાલિયાના બંદર બાયલા અને હાફુન વચ્ચેના દરિયાઈ વિસ્તારોમાં કરવામાં આવ્યું હતું. ભારતીય વાયુસેનાના સમયસર મળેલા ટેકા સાથે નૌકાદળે ચાંચિયાઓ પાસેથી જહાજ અને ક્રૂ સભ્યોને સુરક્ષિત રીતે મુક્ત કરાવ્યા હતા.

કેન્દ્રીય સંરક્ષણ મંત્રી રાજનાથ સિંહે સોશિયલ મીડિયા પ્લેટફોર્મ X પર આ સફળતા બદલ નૌકાદળને અભિનંદન આપ્યા હતા. તેમણે જણાવ્યું હતું કે, શસ્ત્રોથી સજ્જ ચાંચિયાઓ પાસેથી ક્રૂ સભ્યોનું ઝડપી સ્થાન નક્કી કરવું, તેમને રોકવા અને સુરક્ષિત રીતે મુક્ત કરવા એ નૌકાદળની ઉચ્ચ ઓપરેશનલ સજ્જતા અને દરિયાઈ જોખમો સામે નિર્ણાયક રીતે પ્રતિસાદ આપવાની ક્ષમતા દર્શાવે છે. તેમણે વધુમાં ઉમેર્યું હતું કે ભારતના બહાદુર કર્મચારીઓએ જીવનની રક્ષા કરવા અને હિંદ મહાસાગર ક્ષેત્રમાં દરિયાઈ સુરક્ષા અને સ્થિરતા જાળવવાની ભારતની ઈચ્છાશક્તિ અને સંકલ્પનું ફરી એકવાર પ્રદર્શન કર્યું છે.

ભારતીય દરિયાઈ વ્યાપારનું રક્ષણ કરવા અને ચાંચિયાઓ સામે અવરોધક તરીકે કામ કરવા માટે, ૨૩ ઓક્ટોબર, ૨૦૦૮ થી અદન અખાત (Gulf of Aden) માં કોઈપણ સમયે એક ભારતીય યુદ્ધ જહાજ સતત ચોવીસ કલાક એન્ટી-પાયરસી પેટ્રોલિંગ કરી રહ્યું છે. આનાથી દરિયાઈ સમુદાયમાં વિશ્વાસ વધારવામાં મદદ મળે છે.