ગોવિંદ મોહને એકતાનગરમાં રાષ્ટ્રીય એકતા દિવસની તૈયારીઓ ચકાસી

લોખંડી પુરુષ સરદાર વલ્લભભાઈ પટેલની ૧૫૧મી જન્મજયંતિ નિમિત્તે નર્મદા જિલ્લાના એકતાનગર ખાતે તા. ૩૦ અને ૩૧ ઑક્ટોબર, ૨૦૨૬ના રોજ પ્રધાનમંત્રી શ્રી નરેન્દ્રભાઈ મોદીની ઉપસ્થિતિમાં રાષ્ટ્રીય એકતા દિવસની ઉજવણીનું આયોજન કરવામાં આવ્યું છે. આ રાષ્ટ્રીય કક્ષાના કાર્યક્રમની પૂર્વ તૈયારીઓના ભાગરૂપે કેન્દ્રીય ગૃહ સચિવશ્રી ગોવિંદ મોહને એકતાનગરની મુલાકાત લઈ વિવિધ સ્થળોએ ચાલી રહેલી તૈયારીઓનું નિરીક્ષણ કર્યું હતું. તેમણે સંબંધિત અધિકારીઓ સાથે બેઠક યોજી સમગ્ર આયોજનની વિગતવાર સમીક્ષા પણ કરી હતી.

એકતાનગરના સુરવા હેલિપેડ ખાતે આગમન થતાં ઉચ્ચ અધિકારીઓએ ગોવિંદ મોહનનું સ્વાગત કર્યું હતું. ત્યારબાદ તેમણે ઉજવણી માટે તૈયાર કરવામાં આવી રહેલાં વિવિધ સ્થળોની મુલાકાત લઈ કાર્યક્રમનું આયોજન, માળખાકીય સુવિધાઓ અને અન્ય વ્યવસ્થાઓની સમીક્ષા કરી હતી.

ગોવિંદ મોહને સૌપ્રથમ મહાનુભાવોના રોકાણ માટે તૈયાર કરવામાં આવી રહેલા LWE ટેન્ટ્સ/PODS આવાસ સ્થળની મુલાકાત લીધી હતી. ત્યારબાદ તેઓ ટેન્ટ આવાસ સ્થળેથી ટેબ્લો ડોમ પહોંચ્યા હતા, જ્યાં નિર્માણકાર્યોનું નિરીક્ષણ કરી અધિકારીઓ પાસેથી કામગીરીની પ્રગતિ અને આયોજનની વિગતો મેળવી હતી.

તેમણે ટેબ્લો ડોમથી એકતા પથ અને સલામી મંચ સુધીની મુલાકાત લઈ મુખ્ય સમારોહની તૈયારીઓની સમીક્ષા કરી હતી. સ્ટેચ્યુ ઓફ યુનિટી નજીક આવેલા ભારત પર્વ સ્થળે ચાલી રહેલી તૈયારીઓ અને કાર્યક્રમના આયોજન અંગે પણ વિગતો મેળવી હતી. ત્યારબાદ તેમણે પ્રકાશ પર્વની મુલાકાત લીધી હતી.

તા. ૩૦ ઑક્ટોબર, ૨૦૨૬ના રોજ ડેમ વ્યૂ પોઇન્ટ-૧ ખાતે નેશનલ સ્કૂલ ઓફ ડ્રામા (NSD) દ્વારા ‘આનંદમઠ’નું પ્રસ્તુતીકરણ થવાનું છે. આ કાર્યક્રમને ધ્યાનમાં રાખીને ગોવિંદ મોહને ડેમ વ્યૂ પોઇન્ટ-૧ની મુલાકાત લઈ સ્થળ પરની તૈયારીઓનું નિરીક્ષણ કર્યું હતું.

ત્યારબાદ એકતાનગરના વીવીઆઈપી સર્કિટ હાઉસ ખાતે તેમણે સંબંધિત ઉચ્ચ અધિકારીઓ સાથે સમીક્ષા બેઠક યોજી હતી. રાષ્ટ્રીય એકતા દિવસની ઉજવણી દરમિયાનના કાર્યક્રમો સુચારુ રીતે સંપન્ન થાય અને તૈયારીઓ સમયમર્યાદામાં પૂર્ણ થાય તે બેઠકનો હેતુ હતો.

બેઠકમાં કાર્યક્રમનાં વિવિધ સ્થળોની તૈયારી, મહાનુભાવો માટેની આવાસ વ્યવસ્થા, નિર્માણકાર્યો, ટેબ્લો ડોમ, સલામી મંચ, ભારત પર્વ તથા સાંસ્કૃતિક કાર્યક્રમોના આયોજન અંગે ચર્ચા થઈ હતી. તમામ સંબંધિત વિભાગો વચ્ચે સંકલન જાળવી કામગીરી સમયસર પૂર્ણ કરવા જરૂરી સૂચનો પણ આપવામાં આવ્યાં હતાં.

બેઠકમાં ડાયરેક્ટર ઓફ આઈ.બી. શ્રી મહેશ દીક્ષિત, ગુજરાત ચીફ સેક્રેટરી શ્રી એમ.કે.દાસ, DG CRPF શ્રી જ્ઞાનેદ્ર પ્રતાપ, નર્મદા નિગમ તથા સ્ટેચ્યુ ઓફ યુનિટીના ચેરમેનશ્રી મુકેશ પુરી, ADG-SPG શ્રી એસ. સુરેશ, DGP ગુજરાત શ્રી જ્ઞાનેદર સિંઘ મલિક, સ્પેશિયલ ડિરેક્ટર IB શ્રી જગ મોહન અને પ્રિન્સિપાલ સેક્રેટરી હોમ શ્રી સંજીવ કુમાર સહિત ઉચ્ચ કક્ષાના અધિકારીઓ ઉપસ્થિત રહ્યાં હતાં.