હલદરવા શાળામાં રાત્રિ વિશ્રામ બાદ રાજ્યપાલે વિદ્યાર્થીઓ સાથે યોગ કર્યો

લોકભવન, અમદાવાદ :: ગુજરાતના રાજ્યપાલ આચાર્ય દેવવ્રતજીએ ગ્રામ કલ્યાણ કાર્યક્રમ અંતર્ગત ભરૂચ તાલુકાના હલદરવા ગામની પ્રાથમિક શાળાના સાધારણ કક્ષમાં રાત્રિ વિશ્રામ કર્યો હતો. વહેલી સવારે શાળાના પ્રાંગણમાં તેમણે વિદ્યાર્થીઓ, શિક્ષકો અને ગ્રામવાસીઓ સાથે યોગાભ્યાસ કર્યો હતો.

યોગ અને પ્રાણાયામના શારીરિક તથા માનસિક લાભો સમજાવતાં રાજ્યપાલે જણાવ્યું હતું કે સ્વસ્થ શરીરમાં જ સ્વસ્થ મસ્તિષ્કનો વાસ હોય છે. યોગ આપણી પ્રાચીન સંસ્કૃતિની અમૂલ્ય ભેટ છે, જે શારીરિક અને માનસિક રીતે સુદ્રઢ તથા સશક્ત બનાવે છે. તેમણે વિદ્યાર્થીઓ અને નાગરિકોને યોગને દૈનિક જીવનશૈલીનો અભિન્ન ભાગ બનાવવા પ્રેર્યા હતા.

વિદ્યાર્થીઓ અને યુવાધનને માર્ગદર્શન આપતાં રાજ્યપાલે મોબાઈલની લત અને અસ્વસ્થ આદતોથી દૂર રહેવાની શીખ આપી હતી. બાળકોને ઉચ્ચ નૈતિક સંસ્કાર, નિયમિતતા અને રાષ્ટ્ર પ્રથમની ભાવનાને સર્વોપરી રાખીને મન લગાવી અભ્યાસ કરવા તેમણે હૃદયપૂર્વક આહ્વાન કર્યું હતું.