રાજ્યપાલે અંકલેશ્વરમાં ગાય દોહી, ખેડૂતોને દેશી ગાય પાળવા કહ્યું

ભરૂચ જિલ્લાની બે દિવસીય મુલાકાતના બીજા દિવસે રાજ્યપાલ આચાર્ય દેવવ્રતજીએ અંકલેશ્વર તાલુકાના દીવી ગામે પ્રગતિશીલ ખેડૂત બળવંતભાઈ અમાઈદાસ પટેલના પ્રાકૃતિક કૃષિ મોડેલ ફાર્મની મુલાકાત લીધી હતી. ત્યાં તેમણે સ્વયં ગાય દોહી હતી અને ખેડૂતોને દેશી ગાયનું પાલન કરવા ભારપૂર્વક જણાવ્યું હતું.

રાજ્યપાલે ખેતરમાં ઉગાડેલા જમરૂખ, ચીકુ, સરગવો, કેળા, આંબા, મીઠો લીમડો અને વેલાવાળાં શાકભાજી સહિત રીંગણ તથા દૂધીના પાકનું નિરીક્ષણ કર્યું હતું. પાકોની ગુણવત્તા જોઈ તેમણે સંતોષ વ્યક્ત કર્યો હતો.

ખેડૂતો સાથેના સંવાદમાં રાજ્યપાલે જણાવ્યું હતું કે રાસાયણિક ખાતરો અને કીટનાશકોના વધુ પડતા ઉપયોગથી જમીનના ઉપયોગી અળસિયા અને સૂક્ષ્મ જીવાણુઓ નાશ પામે છે. તેના કારણે ખેડૂતોને નાઇટ્રોજન, પોટાશ અને ફોસ્ફરસ જેવા તત્ત્વો બહારથી ઉમેરવા પડે છે. તેમના જણાવ્યા મુજબ રાસાયણિક ખેતીથી જમીન બગડે છે, જ્યારે પ્રાકૃતિક ખેતીથી જમીન ફળદ્રુપ બને છે. રાસાયણિક ખેતી ચાલુ રહેશે તો આવનારી પેઢીઓ માટે ફળદ્રુપ જમીન નહીં બચે. પ્રાકૃતિક ખેતીથી ખર્ચ ઘટે છે અને આવક બમણી થાય છે; ગુજરાતના અનેક ખેડૂતો ઓછી મજૂરી અને ઓછા ખર્ચે વાર્ષિક લાખો રૂપિયાની કમાણી કરી રહ્યા છે.

રાજ્યપાલે જણાવ્યું હતું કે સમગ્ર ગુજરાતમાં ૮ લાખથી વધુ અને ભરૂચ જિલ્લામાં ૨૦ હજારથી વધુ ખેડૂતો પ્રાકૃતિક કૃષિ અપનાવી રહ્યા છે. ખેડૂતોને બજાર અને નાગરિકોને રસાયણમુક્ત ખેતપેદાશો મળી રહે તે માટે રાજ્ય સરકારે ૧૨૦૦થી વધુ વેચાણ કેન્દ્રો શરૂ કર્યાં છે; તેમાં ભરૂચ જિલ્લામાં ૪૯ જેટલાં કેન્દ્રો કાર્યરત છે. વિજયા દશમી નિમિત્તે તેમણે ખેડૂતોને રાસાયણિક ખેતી છોડીને પ્રાકૃતિક ખેતી અપનાવવાનો સંકલ્પ લેવડાવ્યો હતો. આ મુલાકાતે ખેતીવાડી વિભાગ અને વહીવટી તંત્રના વરિષ્ઠ અધિકારીઓ, મોડેલ ફાર્મના ખેડૂત તથા તેમના પરિવારજનો અને સ્થાનિક ખેડૂતો ઉપસ્થિત રહ્યા હતા.