રાજ્યપાલે બોરભાઠામાં વસાવા પરિવાર સાથે અલ્પાહાર કરી સંવાદ સાધ્યો

ગુજરાતના રાજ્યપાલ શ્રી આચાર્ય દેવવ્રતજીએ તેમના પ્રવાસના દ્વિતીય દિવસે વહેલી સવારે બોરભાઠા ગામના નિવાસી રવિભાઈ વસાવાના ઘરે આત્મીય મુલાકાત લીધી હતી. તેમણે વસાવા પરિવારના આંગણે અલ્પાહાર કર્યો હતો અને પરિવારના સભ્યો સાથે સંવાદ સાધ્યો હતો.

મુલાકાત દરમિયાન રાજ્યપાલશ્રીએ રવિભાઈ વસાવા અને તેમના પરિવારજનોના ક્ષેમકુશળ પૂછ્યા હતા તથા ઘરના સભ્યો સાથે સહજતાથી વાર્તાલાપ કર્યો હતો. તેમના સરળ અને સાદગીપૂર્ણ વ્યવહારથી વસાવા પરિવારમાં આનંદ અને ગૌરવની લાગણી વ્યાપી ગઈ હતી.

આ પ્રસંગે રાજ્યપાલશ્રીએ રવિભાઈ વસાવા અને તેમના પરિવારને ગાંધીનગર સ્થિત લોકભવન ખાતે પધારવા આમંત્રણ આપ્યું હતું. વસાવા પરિવારે રાજ્યપાલશ્રીના આગમન અને નિમંત્રણ બદલ આભાર વ્યક્ત કર્યો હતો.