જાપાનમાં નાયબ મુખ્યમંત્રી હર્ષ સંઘવીના ટોક્યો-શિઝુઓકામાં ૧૧ મેગા ઇન્વેસ્ટમેન્ટ એન્ગેજમેન્ટ્સ

આગામી વાઇબ્રન્ટ ગુજરાત ગ્લોબલ સમિટ અંતર્ગત વૈશ્વિક રોકાણકારોને આકર્ષવા અને ગુજરાત-જાપાન વચ્ચેના આર્થિક સંબંધોને નવી ઊંચાઈએ લઈ જવા માટે જાપાન પ્રવાસે ગયેલા નાયબ મુખ્યમંત્રી હર્ષ સંઘવીની અધ્યક્ષતામાં આજે ટોક્યો અને શિઝુઓકા ખાતે કુલ ૭ વન-ટુ-વન બેઠકો, ૨ સરકારી-દ્વિપક્ષીય મુલાકાતો, ૧ ટેક્સટાઇલ રાઉન્ડટેબલ અને ૧ સત્તાવાર ડિનર સહિત કુલ ૧૧ જેટલા મહત્વપૂર્ણ કાર્યક્રમો યોજાઈ રહ્યા છે.

દિવસના પ્રારંભિક સત્રમાં નાયબ મુખ્યમંત્રીશ્રીની અધ્યક્ષતામાં ૪ મહત્વપૂર્ણ વન-ટુ-વન બેઠકો સફળતાપૂર્વક સંપન્ન થઈ હતી. જેમાં અલ્ટ્રાફેબ્રિક્સ હોલ્ડિંગ્સ કંપનીના પ્રેસિડેન્ટ શ્રી યોશિમુરા સાથે સિન્થેટિક લેધર અને સંલગ્ન ક્ષેત્રોમાં રોકાણની વિપુલ સંભાવનાઓ અંગે વિચારવિમર્શ થયો હતો. કાનેકા કોર્પોરેશન કંપનીના પ્રેસિડેન્ટ શ્રી ઇસાવ ઓત્સુ સાથે કેમિકલ અને લાઇફસાયન્સ ક્ષેત્રે ગુજરાત સાથે ભાગીદારી મજબૂત બનાવવા અંગે વિસ્તૃત ચર્ચા થઈ હતી. આ ઉપરાંત ઇતોચુ કોર્પોરેશન ટ્રેડિંગ અને ગ્રીન ઇનોવેશન બિઝનેસ યુનિટના વરિષ્ઠ હોદ્દેદારો સાથે ગ્રીન એનર્જી અને વૈશ્વિક વેપાર ક્ષેત્રે સહયોગ સાધવા મંત્રણા યોજાઈ હતી તેમજ ડેલિગેશન દ્વારા હાઇરેસો સાથે ક્લાઉડ કમ્પ્યુટિંગ અને ગ્લોબલ કેપેબિલિટી સેન્ટર્સ (GCC) સંદર્ભે મહત્વપૂર્ણ બેઠક યોજવામાં આવી હતી.

દિવસના બીજા ચરણમાં નાયબ મુખ્યમંત્રીશ્રી બુલેટ ટ્રેન મારફતે શિઝુઓકા પહોંચશે. શિઝુઓકા પ્રીફેક્ચર ગવર્નમેન્ટ બિલ્ડિંગ ખાતે તેઓ ગવર્નર શ્રીયુત યાસુતોમો સુઝુકી સાથે દ્વિપક્ષીય બેઠક યોજી ગુજરાત અને શિઝુઓકા વચ્ચે ઔદ્યોગિક વિકાસ, આધુનિક ટેકનોલોજી અને સંયુક્ત સહયોગ અંગે ચર્ચા કરશે તેમજ તેમને વાઇબ્રન્ટ ગુજરાત સમિટમાં જોડાવા નિમંત્રણ આપશે.

શિઝુઓકાથી ટોક્યો પરત ફર્યા બાદ સાંજના સત્રમાં ફ્યુજીફિલ્મ કોર્પોરેશન સાથે ઇલેક્ટ્રોનિક મટિરિયલ્સ અને કોંગ્લોમરેટ રોકાણો અંગે, ઓટો કમ્પોનન્ટ ક્ષેત્રની અગ્રણી યાઝાકી ઇન્ડિયા પ્રાઇવેટ લિમિટેડ સાથે અને કાર્બન ક્રેડિટ ક્ષેત્રે કાર્યરત ગ્રીન કાર્બનના પ્રતિનિધિઓ સાથે બેઠકો યોજાશે. આ ઉપરાંત 'રાઉન્ડટેબલ વિથ ટેક્સટાઇલ પ્લેયર્સ' બેઠકમાં ગુજરાતના અદ્યતન ટેક્સટાઇલ ઇકોસિસ્ટમ, નવી ટેક્સટાઇલ નીતિ અને વૈશ્વિક નિકાસની તકો રજૂ કરી વાઇબ્રન્ટ ગુજરાતમાં સહભાગી થવા અનુરોધ કરાશે. દિવસના અંતે જાપાન ખાતેના ભારતીય રાજદૂત દ્વારા ‘ઇન્ડિયા હાઉસ’ ખાતે નાયબ મુખ્યમંત્રીશ્રી અને ડેલિગેશનના સન્માનમાં વિશેષ ડિનર યોજાશે.