તેજલબેન ડામોરે એશિયન પેરા ગેમ્સમાં બ્રોન્ઝ મેડલ જીત્યો

ગાંધીનગર, ૨૦ ઓક્ટોબર :: જાપાનના આઇચી-નાગોયા ખાતે આયોજિત એશિયન પેરા ગેમ્સ-૨૦૨૬માં દાહોદની દૃષ્ટિબાધિત દોડવીર તેજલબેન અમરજી ડામોરે મહિલા ૨૦૦ મીટર T12 સ્પર્ધામાં બ્રોન્ઝ મેડલ જીત્યો છે. પોતાના શ્રેષ્ઠ દેખાવ સાથે તેમણે આંતરરાષ્ટ્રીય સ્તરે નવી સિદ્ધિ હાંસલ કરી છે.

સ્પોર્ટ્સ ઓથોરિટી ઑફ ઇન્ડિયા (SAI)ના ગાંધીનગર સ્થિત નેશનલ સેન્ટર ઑફ એક્સેલન્સમાં તાલીમ લઈ રહેલાં ૨૪ વર્ષનાં તેજલબેને હીટ્સમાં ૨૫.૨૫ સેકન્ડનો સમય નોંધાવી ફાઇનલમાં સ્થાન મેળવ્યું હતું. અગાઉ સપ્ટેમ્બર ૨૦૨૬માં દુબઈ પેરા એથ્લેટિક્સ ગ્રાન્ડ પ્રિક્સમાં તેમણે ૨૫.૪૭ સેકન્ડના સમય સાથે ગોલ્ડ મેડલ જીત્યો હતો.

તેજલબેને પોતાની સફળતાનો શ્રેય કોચ નીતિન ચૌધરીને આપ્યો હતો. મેડલ પાછળ કોચની સતત મહેનત, શિસ્ત અને માર્ગદર્શનનો મોટો ફાળો હોવાનું તેમણે જણાવ્યું હતું.

સંઘર્ષપૂર્ણ પરિસ્થિતિઓમાંથી આગળ આવેલાં તેજલબેને ૨૦૨૨માં પેરા એથ્લેટિક્સની શરૂઆત કરી હતી. વર્ષ ૨૦૨૫ની વર્લ્ડ પેરા એથ્લેટિક્સ ચેમ્પિયનશિપમાં છઠ્ઠું સ્થાન મેળવ્યા બાદ તેમણે ૨૦૨૬ની રાષ્ટ્રીય ચેમ્પિયનશિપ અને દુબઈ ગ્રાન્ડ પ્રિક્સમાં સુવર્ણચંદ્રક જીત્યો હતો.

કેન્દ્ર સરકારના યુવા બાબતો અને રમતગમત મંત્રાલય દ્વારા ACTC યોજના હેઠળ તેજલબેનની રમતગમતની તૈયારી માટે રૂ. ૨,૦૫,૯૬૧ની નાણાકીય સહાય આપવામાં આવી છે. SAI ગાંધીનગર ખાતે તેમને કોચિંગ, રમતગમતની સુવિધાઓ અને જરૂરી માળખાકીય સહયોગ પણ પૂરો પાડવામાં આવે છે.

તેજલબેનની મુખ્ય સ્પર્ધા ૪૦૦ મીટર T12 હવે યોજાવાની છે. ૨૦૦ મીટરમાં મળેલા મેડલથી આત્મવિશ્વાસ વધ્યો હોવાનું જણાવી તેમણે આગામી સ્પર્ધામાં પણ શ્રેષ્ઠ પ્રદર્શન કરવાની આશા વ્યક્ત કરી હતી. દાહોદમાં દૃષ્ટિબાધિત બાળકો માટે દોડનો વિશેષ ટ્રેક બનાવવાનું તેમનું સ્વપ્ન છે.