કચ્છના બાગાયતદારો ત્રણ નવી યોજનાઓ માટે અરજી કરી શકશે

કચ્છ : : નાણાંકીય વર્ષ ૨૦૨૬-૨૭ માટે બાગાયત ખાતાએ કચ્છ જિલ્લાના ખેડૂતો માટે ત્રણ નવી યોજનાઓ અમલમાં મૂકી છે. યોજનાનો લાભ લેવા ઇચ્છુક ખેડૂતો આઈ-ખેડૂત પોર્ટલ (૨.૦) પર ઓનલાઈન અરજી કરી શકશે.

પ્રથમ યોજના ફળપાકોમાં ફિલ્ડ કવર થકી ગુણવત્તાયુક્ત ઉત્પાદન મેળવવા માટે છે. ૧.૦૦ હેક્ટર વિસ્તારના એકમ માટે રૂપિયા ૫,૦૦,૦૦૦નો ખર્ચ ધ્યાને લઈ, ખર્ચના ૪૦% અથવા મહત્તમ રૂપિયા ૨,૦૦,૦૦૦ પ્રતિ હેક્ટર સહાય મળશે. એકમ ૦.૨૦ હેક્ટરથી વધુ અને મહત્તમ ૧.૦૦ હેક્ટર વિસ્તારમાં બનાવવાનું રહેશે. સહાય પ્રોરેટા બેઝ મુજબ અપાશે.

બીજી યોજના બહુસ્તરીય પદ્ધતિથી ફળપાકોનો વાવેતર વિસ્તાર વધારવા માટે છે. આ કાર્યક્રમમાં અતિઘનિષ્ટ ખેતી પદ્ધતિથી એકથી વધુ ફળપાકનું વાવેતર કરવાનું રહેશે. પાકવાર નિયત પ્રતિ રોપા, કલમ અથવા ટીશ્યૂ રોપા દીઠ ખર્ચ અને ખરેખર થયેલા ખર્ચમાંથી જે ઓછો હોય તે આધારે, વાવેતર કરાયેલા રોપાની સંખ્યા મુજબ સહાય મળશે.

ત્રીજી યોજના રાઈઝોમેટીક (આદુ, હળદર) પાકોને પ્રોત્સાહિત કરવા માટે છે. એકમ ખર્ચ રૂપિયા ૧ લાખ પ્રતિ હેક્ટર છે. તેમાં પ્લાન્ટીંગ મટીરીયલ (બિયારણ) માટે રૂપિયા ૬૦,૦૦૦ અને મજૂરી તથા અન્ય ખર્ચ માટે રૂપિયા ૨૦,૦૦૦ ધ્યાને લેવાશે. અનુસૂચિત જાતિના ખેડૂતોને ખર્ચના ૭૫% અથવા મહત્તમ રૂપિયા ૭૫,૦૦૦ પ્રતિ હેક્ટર સહાય મળશે.

ત્રણેય ઘટકો માટે અરજી ૩૦/૧૦/૨૦૨૬ સુધીમાં આઈ-ખેડૂત પોર્ટલ (૨.૦) પર કરવાની રહેશે. ખેડૂતોને પોર્ટલમાં આપેલા યુઝર મેન્યુઅલ મુજબ અરજી કરવા સૂચિત કરાયા છે. વધુ માહિતી માટે નાયબ બાગાયત નિયામકશ્રીની કચેરી, રૂમ નં: ૩૨૦, બીજો માળ, બહુમાળી ભવન, ભુજ, જિ. કચ્છ ખાતે રૂબરૂ અથવા ફોન નં: ૦૨૮૩૨-૨૨૨૭૧૩ પર સંપર્ક કરી શકાશે, તેમ નાયબ બાગાયત નિયામક ભુજ, જિ. કચ્છે જણાવ્યું છે.