કુકમાની શાળામાં ૨૦૮ વિદ્યાર્થીઓ માટે સુરક્ષા જાગૃતિ કાર્યક્રમ યોજાયો

કચ્છ :: જિલ્લા મહિલા અને બાળ અધિકારીની કચેરી, કચ્છ દ્વારા ભુજ તાલુકાના કુકમા સ્થિત પ્રાથમિક માધ્યમિક શાળામાં “બેટી બચાઓ, બેટી પઢાઓ” સેલ અંતર્ગત ‘સેફ ટચ–અનસેફ ટચ તથા સાયબર ક્રાઈમ અંગે જાગૃતિ કાર્યક્રમ’ યોજાયો હતો. તેમાં કુલ ૨૦૮ વિદ્યાર્થીઓએ ઉત્સાહપૂર્વક ભાગ લીધો હતો.

કાર્યક્રમમાં શાળાના આચાર્ય મીતભાઈ મેર, DHEWના SFL ક્રિષ્નાબેન ભુડિયા તથા સખી વન સ્ટોપ સેન્ટર (OSC)નાં પેરા લીગલ અર્ચનાબેન અને પારૂલબેન ઉપસ્થિત રહ્યાં હતાં.

SFL ક્રિષ્નાબેન ભુડિયાએ વિદ્યાર્થીઓને સાયબર ક્રાઈમ અને સાયબર સલામતી અંગે સમજ આપી હતી. મોબાઇલ તથા ઇન્ટરનેટનો સુરક્ષિત ઉપયોગ કરવા, અજાણી વ્યક્તિની ફ્રેન્ડ રિક્વેસ્ટ કે મેસેજ સ્વીકારવામાં સાવચેતી રાખવા તથા વ્યક્તિગત માહિતી, પાસવર્ડ, OTP, ફોટા કે વિડિયો અન્ય સાથે શેર ન કરવા જણાવાયું હતું. અજાણી લિંક પર ક્લિક ન કરવા અને સોશિયલ મીડિયામાં ગોપનીયતા જાળવવા પણ માર્ગદર્શન અપાયું હતું. સાયબર છેતરપિંડી કે અયોગ્ય ઓનલાઈન પ્રવૃત્તિનો ભોગ બને ત્યારે ગભરાયા વગર વિશ્વાસુ વાલી, શિક્ષક અથવા જવાબદાર વ્યક્તિને તરત જાણ કરવા સમજાવાયું હતું.

વિદ્યાર્થીઓને ઇમરજન્સી હેલ્પલાઇન વિશે પણ માહિતી અપાઈ હતી. મહિલાઓને મુશ્કેલી કે હિંસા સમયે મદદરૂપ ‘૧૮૧ મહિલા અભયમ હેલ્પલાઈન’, તાત્કાલિક પોલીસ સહાય માટે ‘૧૧૨ જનરક્ષક’, સાયબર ફ્રોડ કે ઓનલાઈન નાણાકીય છેતરપિંડીની તાત્કાલિક ફરિયાદ માટે ‘૧૯૩૦ સાયબર હેલ્પલાઈન’ અને બાળકોને શોષણ કે સંકટ સમયે રક્ષણ આપતી ‘૧૦૯૮ ચાઈલ્ડ હેલ્પલાઈન’ અંગે સમજ આપવામાં આવી હતી.

સખી વન સ્ટોપ સેન્ટર (OSC)નાં પેરા લીગલ અર્ચનાબેને બાળકોને સેફ ટચ–અનસેફ ટચ અને વ્યક્તિગત સુરક્ષા અંગે માર્ગદર્શન આપ્યું હતું. બાળકોમાં વ્યક્તિગત સુરક્ષા, સાયબર સલામતી, જવાબદાર ડિજિટલ વર્તન અને મુશ્કેલીના સમયે યોગ્ય હેલ્પલાઇનનો સંપર્ક કરવા અંગે જાગૃતિ કેળવવાનો કાર્યક્રમનો મુખ્ય હેતુ હતો.