કચ્છની મહિલા પશુપાલકોએ બનાસ ડેરીમાં પાંચ દિવસીય પ્રેરણા પ્રવાસ કર્યો

જિલ્લા વિકાસ અધિકારીશ્રી ઉત્સવ ગૌતમ તથા જિલ્લા ગ્રામ વિકાસ એજન્સી કચ્છના નિયામકશ્રી નિકુંજ પરીખના માર્ગદર્શન હેઠળ DAY-NRLM યોજના અંતર્ગત કચ્છ જિલ્લાની મહિલા પશુપાલકો માટે તા. ૧૫/૧૦/૨૦૨૬ થી ૧૯/૧૦/૨૦૨૬ દરમિયાન બનાસ ડેરી ખાતે પાંચ દિવસીય પ્રેરણા પ્રવાસનું આયોજન કરવામાં આવ્યું હતું.

પ્રવાસ દરમિયાન મહિલાઓએ બનાસ ડેરીના વિવિધ ડેરી પ્લાન્ટની રૂબરૂ મુલાકાત લીધી હતી. ડેરી ઉદ્યોગની આધુનિક કામગીરી, દૂધ પ્રોસેસિંગ, દૂધની બનાવટોમાં મૂલ્યવર્ધન અને ડેરી વ્યવસ્થાપન અંગે તજજ્ઞો પાસેથી વિસ્તૃત માહિતી તથા સીધું માર્ગદર્શન મેળવ્યું હતું.

મહિલાઓએ દાંતીવાડા ખાતે આવેલી કૃષિ યુનિવર્સિટી, વિવિધ ઓર્ગેનિક ફાર્મ અને FPO (ફાર્મર પ્રોડ્યુસર ઓર્ગેનાઈઝેશન)ની પણ મુલાકાત લીધી હતી. ત્યાં કૃષિ, પશુપાલન અને આજીવિકા આધારિત નફાકારક પ્રવૃત્તિઓમાં વૈજ્ઞાનિક તથા આધુનિક પદ્ધતિઓ વિશે નિષ્ણાતો પાસેથી જાણકારી મેળવી હતી.

પ્રવાસથી મહિલા પશુપાલકો ડેરી અને કૃષિ ક્ષેત્રે કાર્યરત સંસ્થાઓની કામગીરીથી પરિચિત થઈ પોતાની વ્યવસાયિક સમજ, કૌશલ્ય અને આજીવિકાની તકો વધારવા સક્ષમ બની શકશે. સ્વ-સહાય જૂથ સાથે જોડાયેલી મહિલાઓને પશુપાલન તથા અન્ય આજીવિકાલક્ષી પ્રવૃત્તિઓ વધુ સક્ષમ અને આવકવર્ધક બનાવવા આ પ્રવાસ ઉપયોગી અને માર્ગદર્શક રહ્યો હતો. કાર્યક્રમ દરમિયાન મહિલાઓએ ઉત્સાહભેર ભાગ લીધો અને નવીનત્તમ પદ્ધતિઓ જાણવાનો સકારાત્મક અભિગમ દાખવ્યો હતો.