ટોક્યોમાં નાયબ મુખ્યમંત્રી હર્ષ સંઘવીએ જાપાની ઉદ્યોગોને ગુજરાતમાં રોકાણ કરવા આહ્વાન કર્યું

આગામી વાઇબ્રન્ટ ગુજરાત ગ્લોબલ સમિટના સંદર્ભમાં જાપાનના પ્રવાસે ગયેલા નાયબ મુખ્યમંત્રી શ્રી હર્ષ સંઘવીના નેતૃત્વ હેઠળના ગુજરાત પ્રતિનિધિમંડળે ટોક્યોમાં જાપાનના સરકારી અગ્રણીઓ અને અગ્રણી ઉદ્યોગગૃહો સાથે શ્રેણીબદ્ધ બેઠકો યોજી હતી. એક જ દિવસમાં ગુજરાત પ્રતિનિધિમંડળે ૨૦ મહત્વપૂર્ણ બેઠકો અને ૨ રાઉન્ડટેબલ સંવાદો યોજ્યા હતા. આ સંવાદોનો ઉદ્દેશ ગુજરાતમાં નવા રોકાણ, ટેક્નોલોજી સહયોગ અને ઔદ્યોગિક વિસ્તરણની તકોને પ્રોત્સાહન આપવાનો હતો.

નાયબ મુખ્યમંત્રી શ્રી હર્ષ સંઘવી અને પ્રતિનિધિમંડળે જાપાનના વિદેશ મંત્રાલય ખાતે વિદેશ રાજ્ય મંત્રી શ્રી નાકાસોને યાસુતાકા સાથે બેઠક યોજી ભારત–જાપાન અને ખાસ કરીને ગુજરાત–જાપાન વચ્ચેના ઐતિહાસિક સંબંધોને વધુ મજબૂત બનાવવા તથા વ્યૂહાત્મક ભાગીદારી અંગે વિચારવિમર્શ કર્યો હતો. ઇવાતે પ્રીફેક્ચરના ગવર્નર શ્રી તાકુયા તાસો સાથે પ્રાદેશિક વિકાસ, ઔદ્યોગિક નીતિઓ અને ક્ષમતા નિર્માણ અંગે જ્યારે METIના ડાયરેક્ટર જનરલ શ્રી તનાકા કાઝુશિગે સાથે દ્વિપક્ષીય વેપાર વધારવા, રોકાણને પ્રોત્સાહન આપવા અને નીતિગત સહયોગ મજબૂત કરવા અંગે ચર્ચા થઈ હતી.

આ ઉપરાંત, સુઝુકી મોટર કોર્પોરેશનના રિપ્રેઝન્ટેટિવ ડિરેક્ટર અને પ્રેસિડેન્ટ શ્રી તોશિહિરો સુઝુકી સાથે બેઠક યોજી ઓટોમોબાઇલ ક્ષેત્રના વિસ્તરણ, ઇલેક્ટ્રિક વાહનો અને વેન્ડર પાર્ક્સના વિકાસ અંગે ચર્ચા કરી હતી તેમજ સુઝુકીના વેન્ડર્સ સાથે વિશેષ રાઉન્ડટેબલ બેઠક યોજી હતી. જેરાના સીઈઓ શ્રી ઇઝુમી કાઈ સાથે સ્વચ્છ ઊર્જા અને ગ્રીન ટ્રાન્ઝિશન તથા ટોક્યો ઇલેક્ટ્રોન ਲિમિટેડના ચેરમેન શ્રી તાકેશી ઓકુબો સાથે સેમિકન્ડક્ટર ક્ષેત્રે રોકાણ અંગે વિચારવિમર્શ કર્યો હતો.

પ્રતિનિધિમંડળે સુમિતોમો કેમિકલ, ફુરુકાવા ઇલેક્ટ્રિક, મારુબેની કોર્પોરેશન, મોરીરીન લિમિટેડ તથા વિશ્વની સૌથી મોટી લાઈવ એન્ટરટેઇનમેન્ટ કંપની લાઈવ નેશન સાથે બેઠકો યોજી હતી. આ સિવાય હોન્ડા મોટર, ક્યોવા લેધર, સનરિયો, મેઇરાકુ કોર્પોરેશન, નિસ્સેઇ પ્લાસ્ટિક ઇન્ડસ્ટ્રિયલ, જેએફઇ સ્ટીલ, ઓત્સુકા ફાર્માસ્યુટિકલ્સ, એમયુએફજી બેંક અને એસએમબીસી જૂથો સાથે પણ ચર્ચાઓ કરી વાઇબ્રન્ટ ગુજરાત ગ્લોબલ સમિટમાં સહભાગી થવા આમંત્રણ પાઠવ્યું હતું.