વાઈસ એડમીરલ સંજય વાત્સયને મુખ્યમંત્રી ભૂપેન્દ્ર પટેલ સાથે મુલાકાત કરી

મુખ્યમંત્રી શ્રી ભૂપેન્દ્ર પટેલની સૌજન્ય મુલાકાતે ભારતીય નૌકા દળના વેસ્ટર્ન નેવલ કમાન્ડના ફ્લેગ ઓફિસર કમાન્ડીંગ ઈન-ચીફ વાઈસ એડમીરલ શ્રી સંજય વાત્સયને ગાંધીનગરમાં મુલાકાત લીધી હતી.

વાઈસ એડમીરલ શ્રી સંજય વાત્સયને મે-2026થી ભારતીય નૌકા દળના વેસ્ટર્ન નેવલ કમાન્ડના 35માં ફ્લેગ ઓફિસર કમાન્ડીંગ ઈન ચીફ તરીકેનો કાર્યભાર સંભાળ્યો છે. મુખ્યમંત્રીશ્રી સાથેની સૌજન્ય મુલાકાતમાં તેમણે ગુજરાતના વ્યૂહાત્મક સમુદ્રકિનારાની સુરક્ષા અંગે ભારતીય નૌ સેનાની વિવિધ ગતિવિધિઓની જાણકારી આપી હતી.

શ્રી સંજય વાત્સયન 1988થી ભારતીય નૌકા દળમાં સેવારત થયા છે. સેવાકાળ દરમિયાન તેમણે અનેક અગ્રણી યુદ્ધજહાજો પર સેવા આપી છે. વેસ્ટર્ન નેવલ કમાન્ડના ફ્લેગ ઓફિસર કમાન્ડીંગ ઈન ચીફનો પદભાર સંભાળતા પહેલાં તેઓ નેવલ હેડ ક્વાર્ટર્સ ખાતે વાઈસ ચીફ ઓફ ધ નેવલ સ્ટાફ તરીકે ફરજ બજાવતા હતા.

વેસ્ટર્ન નેવલ કમાન્ડના ફ્લેગ ઓફિસર કમાન્ડીંગ ઈન ચીફના નેતૃત્વ હેઠળ સમગ્ર અરબી સમુદ્ર, પશ્ચિમ હિન્દ મહાસાગર, હોર્મુઝ સ્ટ્રેટ, બાબ-અલ-મંડેલ સ્ટ્રેટ અને સુએઝ કેનાલ તેમજ મોઝામ્બિક ચેનલ અને કેપ ઓફ ગુડ હોપ જેવા મહત્ત્વપૂર્ણ ચેક પોઈન્ટ્સ આવરી લેવાય છે.

દેશના મહત્ત્વપૂર્ણ પશ્ચિમી દરિયાકાંઠાનું રક્ષણ, વેપાર અને ઊર્જા માર્ગોને સુરક્ષિત કરવા તથા ભારતની દરિયાઈ સરહદોનું રક્ષણ કરવામાં વેસ્ટર્ન નેવલ કમાન્ડની પ્રાથમિક ભૂમિકા છે.

મુલાકાત દરમિયાન વાઈસ એડમીરલ શ્રી સંજય વાત્સયને મુખ્યમંત્રી શ્રી ભૂપેન્દ્ર પટેલને સ્મૃતિચિહ્ન પણ અર્પણ કર્યું હતું.