વડોદરામાં ૨૩મી ઓક્ટોબરે રોજગાર-એપ્રેન્ટીસ ભરતી મેળો યોજાશે

વડોદરા, તા.૨૧: શ્રમ, કૌશલ્ય વિકાસ અને રોજગાર વિભાગની રોજગાર અને તાલીમ નિયામક કચેરી હસ્તકની મદદનીશ રોજગાર નિયામક કચેરી, વડોદરા દ્વારા તા.૨૩.૧૦.૨૦૨૬, શુક્રવારના રોજ સવારે ૧૦.૦૦ કલાકે ભરતી મેળો યોજાશે. મેળો મદદનીશ રોજગાર નિયામકની કચેરી, પહેલો માળ, આઈટીસી બીલ્ડીંગ, આઈટીઆઈ કેમ્પસ, તરસાલી વડોદરા ખાતે યોજાશે.

મેળામાં ઓપરેટર, ટેકનીશ્યન, રિલેશનશિપ ઓફિસર, સેન્ટર એસોસિએટ અને ટ્રેઇની જેવી ૧૦૦ થી વધુ જગ્યા માટે સર્વિસ સેક્ટર, મેન્યુફેક્ચરિંગ, સેલ્સ અને ઈન્શોરંશ સેક્ટરની ૦૬ કંપનીના પ્રતિનિધિઓ ઉમેદવારોના ઈન્ટરવ્યુ લેશે. ૧૦ પાસ, ૧૨ પાસ, આઇ.ટી.આઇ (ફિટર,ટર્નર), ડીપ્લોમાં મેકેનિકલ, કેમીકલ, ઇલેક્ટ્રીકલ તથા ગ્રેજ્યુએટ (બી.એ બીકોમ, બી.એસ.ડબલ્યુ) લાયકાત ધરાવતા ૧૮ થી ૩૫ વર્ષના પુરુષ અને મહીલા ઉમેદવારો ભાગ લઈ શકશે.

ઉમેદવારોને રોજગારી ઉપરાંત વિદેશ રોજગાર અને અભ્યાસ માટે સેફ લીગલ માઈગ્રેશન, પ્રધાનમંત્રી વિકસીત ભારત રોજગાર યોજના (PMVBRY), પીએમ ઈન્ટર્નશીપ યોજના, લશ્કરી ભરતી પુર્વેની ૩૦ દિવસની ફ્રી નિવાસી તાલીમ યોજના, ફ્રી વોકેશનલ તાલીમ યોજના, સ્વરોજગાર અને સ્ટાર્ટ અપ લોન સહાય યોજના અંગે તજજ્ઞો માહિતી અને માર્ગદર્શન આપશે. સરકારી ઓનલાઈન જોબ પોર્ટલ અનુબંધમ અને એનસીએસ પોર્ટલ પર નામ નોંધણી પણ કરવામાં આવશે.

રસ ધરાવતા ઉમેદવારોએ ૫ (પાંચ) બાયોડેટા /રેઝયુમ સાથે સ્વ ખર્ચે ભરતી સ્થળે હાજર રહેવાનું રહેશે. આયોજન અને પસંદગી પ્રક્રીયામાં ઉમેદવાર કે નોકરીદાતાએ કોઈ ફી કે ચાર્જ ચુકવવાનો નથી, તેની ખાસ નોંધ લેવા રોજગાર અધિકારીની અખબારી યાદીમાં જણાવાયું છે.