આણંદ જિલ્લા સ્વાગતમાં ૧૧માંથી ૧૦ પ્રશ્નોનું નિરાકરણ

આણંદ, બુધવાર :: રાજ્યના નાગરિકોના પ્રશ્નોનું ઝડપી અને હકારાત્મક નિરાકરણ લાવવાના ઉદ્દેશ્યથી સમગ્ર રાજ્યમાં પ્રતિમાસ તાલુકા, જિલ્લા અને રાજ્ય કક્ષાએ સ્વાગત કાર્યક્રમ યોજાય છે. આ પ્રજાલક્ષી ફરિયાદ નિવારણ કાર્યક્રમ અંતર્ગત હજારો અરજદારોના પ્રશ્નોનું નિરાકરણ થયું છે.

આણંદ જિલ્લામાં ઓક્ટોબર માસનો 'જિલ્લા સ્વાગત' ફરિયાદ નિવારણ કાર્યક્રમ જિલ્લા કલેક્ટરશ્રી પ્રવીણ ચૌધરીના અધ્યક્ષસ્થાને કલેક્ટર કચેરી, આણંદના સભાખંડ ખાતે યોજાયો હતો. કાર્યક્રમમાં અરજદારોની વિવિધ વિભાગોને લગતી રજૂઆતો ધ્યાનપૂર્વક સાંભળવામાં આવી હતી. જિલ્લા કલેક્ટરશ્રીએ સંબંધિત વિભાગના અધિકારીઓને જરૂરી સૂચના અને માર્ગદર્શન આપ્યાં હતાં.

કાર્યક્રમમાં કુલ ૧૧ પ્રશ્નો રજૂ થયા હતા, જેમાંથી ૧૦ પ્રશ્નોનું સ્થળ પર નિરાકરણ કરવામાં આવ્યું હતું. એક પ્રશ્ન પડતર રાખવામાં આવ્યો હતો, જેનું આગામી સમયમાં નિવારણ કરવામાં આવશે.

કાર્યક્રમમાં જિલ્લા પોલીસ અધિક્ષકશ્રી ગૌરવ જસાણી, નિવાસી અધિક કલેકટરશ્રી લલીતકુમાર પટેલ, અધિક કલેક્ટરશ્રી રાહુલ ગમારા, મદદનીશ કલેકટર અને પ્રાંત અધિકારીશ્રી અંજલી ઠાકુર, નાયબ મ્યુ.કમિશ્નરશ્રી સંગાડા સહિત સંબંધિત વિભાગના અધિકારીઓ તથા અરજદારો ઉપસ્થિત રહ્યા હતા.