મુખ્યમંત્રીએ ૪૦૦થી વધુ વિન્ટેજ કેમેરાના સંગ્રાહક શાંતિલાલ ગજ્જરને બિરદાવ્યા

વડોદરા,તા.૨૧: ગુજરાતના મુખ્યમંત્રીશ્રી ભૂપેન્દ્રભાઇ પટેલે વડોદરાના દાંડિયા બજાર વિસ્તારના રહેવાસી અને ૪૦૦થી વધુ વિન્ટેજ ફિલ્મ કેમેરાનો સંગ્રહ ધરાવતા ૮૩ વર્ષીય શ્રી શાંતિલાલ એસ. ગજ્જરને શુભેચ્છાપત્ર પાઠવી તેમના અનોખા શોખ અને સમર્પણની સરાહના કરી છે.

મુખ્યમંત્રીશ્રીએ પત્રમાં જણાવ્યું હતું કે વડાપ્રધાનશ્રી નરેન્દ્રભાઈ મોદી હંમેશાં કહેતા આવ્યા છે કે વ્યક્તિ પોતાની કુદરતી અભિરુચિ અને કૌશલ્યના ક્ષેત્રમાં કાર્ય કરે તેનાથી મળતો આત્મસંતોષ અને સુખ દુર્લભ છે. આવી પ્રવૃત્તિને ‘સ્વાન્તઃ સુખાય’ કહેવામાં આવે છે.

૮૩ વર્ષની વયે પણ શ્રી ગજ્જર આ પ્રવૃત્તિ અવિરત ચાલુ રાખે છે તે આવકારદાયક અને સરાહનીય છે, એમ મુખ્યમંત્રીશ્રીએ જણાવ્યું હતું. પોલેરાઇડ કેમેરા, રેડિયો કેમેરા, સ્નાઇપર ગન શૈલીનો કેમેરો, ચાવીથી ચાલતા અને સ્પ્રિંગ-વાઇન્ડિંગ મોડેલ્સ સહિત વિવિધ આકાર અને કદના ૧૯૩૦થી ૨૦૦૫ સુધીના ૪૦૦થી વધુ વિન્ટેજ કેમેરાનો તેમનો સંગ્રહ જીવનની સાર્થકતા દર્શાવે છે.

મુખ્યમંત્રીશ્રીએ શ્રી ગજ્જરને પોતાની મનગમતી પ્રવૃત્તિ દ્વારા સમાજને પ્રેરણા આપતા રહેવા શુભેચ્છા પાઠવી હતી.