વડોદરાની ૨૫૦૦૦થી વધુ ચિત્રોની પહેલ વર્લ્ડ બુક ઓફ રેકોર્ડમાં નોંધાઈ

વડોદરા : વડોદરા જિલ્લા શિક્ષણાધિકારીની કચેરી દ્વારા ‘સેવા-સંકલ્પોત્સવ’ અંતર્ગત પ્રાથમિક, માધ્યમિક અને ઉચ્ચતર માધ્યમિક શાળાઓના વિદ્યાર્થીઓનાં ૨૫૦૦૦થી વધુ ચિત્રોનું એક જ સ્થળે પ્રદર્શન યોજાયું. આ પહેલની નોંધ વર્લ્ડ બુક ઓફ રેકોર્ડમાં કરવામાં આવી છે. પ્રદર્શન બે દિવસ માટે ખુલ્લું રાખવામાં આવ્યું હતું.

‘મારો દેશ મારી જવાબદારી’, ‘વિકસિત ભારત મારો સંકલ્પ’ અને ‘સપનાથી સમૃદ્ધિ સુધી’ના વિચાર સાથે વિદ્યાર્થીઓએ વર્ષ ૨૦૪૭ના ભારતનું વિઝન ચિત્રોમાં રજૂ કર્યું. વિકસિત ભારતના નિર્માણ, નશામુક્ત સમાજ, સ્વચ્છતા, સેવા, સમર્પણ અને રાષ્ટ્રના સર્વાંગી વિકાસ જેવા વિચારોને ચિત્રો દ્વારા વ્યક્ત કરવામાં આવ્યા.

આ વિચાર સાંસદ સભ્ય ડૉ. હેમાંગ જોષીની પ્રેરણાથી આગળ વધ્યો હતો. વડોદરા જિલ્લાની શાળાઓમાં તૈયાર થયેલાં ચિત્રોને એક સ્થળે એકત્ર કરીને પ્રદર્શન યોજવાની તેમની સૂચના બાદ આ પહેલ સાકાર થઈ. વર્લ્ડ બુક ઓફ રેકોર્ડની ટીમે પ્રમાણપત્ર સાંસદ ડૉ. હેમાંગ જોષી, જિલ્લા વિકાસ અધિકારી આનંદ પાટીલ અને જિલ્લા શિક્ષણ અધિકારી મહેશભાઈ પાંડેને આપ્યું.

ગુજરાત રાજ્યના શિક્ષણમંત્રી રીવાબા જાડેજા અને પૂર્વ શિક્ષણમંત્રી ભુપેન્દ્રસિંહ ચુડાસમાએ પ્રદર્શનની મુલાકાત લીધી અને સમગ્ર શિક્ષણની વડોદરા ટીમને અભિનંદન પાઠવ્યાં. રીવાબા જાડેજાએ પસંદગીનાં શ્રેષ્ઠ ચિત્રોની ફોટો ફ્રેમ બનાવી વડોદરા જિલ્લાની મુલાકાતે આવતા મહેમાનોને આપવાની ઇચ્છા વ્યક્ત કરી.