વાઇસ એડમિરલ સંજય વાત્સયને રાજ્યપાલ આચાર્ય દેવવ્રતજીની મુલાકાત લીધી

ભારતીય નૌકાદળના વેસ્ટર્ન નેવલ કમાન્ડના ફ્લેગ ઓફિસર કમાન્ડિંગ ઇન-ચીફ વાઇસ એડમિરલ શ્રી સંજય વાત્સયને ગાંધીનગર સ્થિત લોકભવન ખાતે રાજ્યપાલ શ્રી આચાર્ય દેવવ્રતજીની સૌજન્ય મુલાકાત લીધી હતી. આ મુલાકાત દરમિયાન ગુજરાતના વિશાળ અને વ્યૂહાત્મક દરિયાકાંઠાની સુરક્ષા તથા દરિયાઈ સુરક્ષા વ્યવસ્થાઓ અંગે સાર્થક ચર્ચા થઈ હતી.

વાઇસ એડમિરલ શ્રી સંજય વાત્સયને ગત મે-૨૦૨૬થી ભારતીય નૌકાદળના વેસ્ટર્ન નેવલ કમાન્ડના ૩૫મા ફ્લેગ ઓફિસર કમાન્ડિંગ ઇન-ચીફ તરીકેનો કાર્યભાર સંભાળ્યો છે. તેમણે રાજ્યપાલશ્રીને ગુજરાતના વ્યૂહાત્મક રીતે અત્યંત મહત્વપૂર્ણ અને વિશાળ દરિયાકાંઠાની સુરક્ષા તેમજ ભારતીય નૌસેના દ્વારા હાથ ધરવામાં આવતી વિવિધ સુરક્ષાત્મક ગતિવિધિઓની વિસ્તૃત માહિતી આપી હતી.

વર્ષ ૧૯૮૮થી ભારતીય નૌકાદળમાં સેવારત શ્રી સંજય વાત્સયને અનેક અગ્રણી યુદ્ધ જહાજો પર સેવા આપી છે. વેસ્ટર્ન નેવલ કમાન્ડનો પદભાર સંભાળતા પહેલાં તેમણે નેવલ હેડ ક્વાર્ટર્સ ખાતે વાઇસ ચીફ ઓફ ધ નેવલ સ્ટાફ તરીકે ફરજો બજાવી હતી.

વેસ્ટર્ન નેવલ કમાન્ડની મુખ્ય ભૂમિકામાં સમગ્ર અરબી સમુદ્ર, પશ્ચિમ હિન્દ મહાસાગર તેમજ વૈશ્વિક સ્તરે વેપાર અને ઊર્જા માર્ગોના મહત્વપૂર્ણ ચેક પોઈન્ટ્સનું રક્ષણ અને દેશના પશ્ચિમી દરિયાકાંઠાની સુરક્ષા સુનિશ્ચિત કરવાનો સમાવેશ થાય છે.