પાટણ જિલ્લા પંચાયતના ૬ દિવ્યાંગ ઉમેદવારોને નિમણૂક હુકમો અપાયા

માહિતી બ્યુરો, પાટણ તા.૨૧/૧૦/૨૦૨૬ સમાચાર સંખ્યા:૬૯૭/૫૩

ગુજરાત પંચાયત સેવા પસંદગી મંડળ, ગાંધીનગર દ્વારા દિવ્યાંગ ઉમેદવારો માટે હાથ ધરવામાં આવેલી ખાસ ભરતી પ્રક્રિયા અંતર્ગત પાટણ જિલ્લા પંચાયતને ફાળવવામાં આવેલા વિવિધ સંવર્ગના ૬ ઉમેદવારોને આજે જિલ્લા વિકાસ અધિકારીશ્રી સી.એલ. પટેલ અને જિલ્લા પંચાયતના પ્રમુખશ્રી ભાવિકભાઈ પટેલના હસ્તે નિમણૂક હુકમો એનાયત કરવામાં આવ્યા હતા. આ પ્રસંગે જિલ્લા પંચાયતના વિવિધ શાખાધિકારીશ્રીઓ ઉપસ્થિત રહ્યા હતા.

નિમણૂક હુકમો એનાયત કરતાં જિલ્લા વિકાસ અધિકારીશ્રી સી.એલ. પટેલ તથા જિલ્લા પંચાયતના પ્રમુખશ્રી ભાવિકભાઈ પટેલે તમામ ઉમેદવારોને અભિનંદન પાઠવી નવી જવાબદારી માટે શુભેચ્છાઓ વ્યક્ત કરી હતી. તેમણે સરકારી સેવાઓમાં જોડાઈ ખંત, નિષ્ઠા અને જવાબદારીપૂર્વક ફરજો નિભાવવા તથા લોકોપયોગી કાર્યો દ્વારા જનસેવાના ઉદ્દેશને સાકાર કરવા પ્રેરિત કર્યા હતા.

સરકારશ્રીની વિવિધ જનકલ્યાણકારી યોજનાઓનો લાભ સમાજના છેવાડાના માનવી સુધી પહોંચે અને કોઈપણ લાભાર્થી યોજનાના લાભથી વંચિત ન રહે તે સુનિશ્ચિત કરવા તેમણે અનુરોધ કર્યો હતો. નાગરિકોના પ્રશ્નોનું સંવેદનશીલતાપૂર્વક નિરાકરણ લાવી જાહેરસેવા પ્રત્યે સમર્પિત ભાવનાથી કામગીરી કરવા પણ માર્ગદર્શન આપ્યું હતું.