કલેક્ટરે સ્વાગત કાર્યક્રમમાં રજૂઆતોના ત્વરિત નિરાકરણના નિર્દેશ આપ્યા

માહિતી બ્યુરો, પાટણ તા.૨૧/૧૦/૨૦૨૬ :: પાટણ જિલ્લા કલેક્ટર અને જિલ્લા મેજિસ્ટ્રેટ ડૉ. પ્રશાંત જિલોવાના અધ્યક્ષસ્થાને જિલ્લા કક્ષાના સ્વાગત ફરિયાદ નિવારણ કાર્યક્રમ અંગે બેઠક યોજાઈ હતી. તેમાં અરજદારોએ ઉપસ્થિત રહી પોતાની વિવિધ સમસ્યાઓ અને પ્રશ્નો અંગે રજૂઆતો કરી હતી.

સ્વાગત કાર્યક્રમમાં રોડ, રસ્તા, વીજપોલ, કેનાલ, જમીન રી સર્વે, ગટર, જિલ્લાની ગ્રામપંચાયતોમાં સામાજિક ન્યાય સમિતિની રચના અને બેઠક વ્યવસ્થા તથા આઈટીઆઈ બાલીસણા ખાતે કાયમી બસ સ્ટોપ આપવા સહિતના પ્રશ્નોની વિગતવાર ચર્ચા અને સમીક્ષા કરવામાં આવી હતી.

જિલ્લા કલેક્ટર ડૉ. પ્રશાંત જિલોવાએ અરજદારોની રજૂઆતો ધ્યાનપૂર્વક સાંભળી સંબંધિત પ્રશ્નોની સમીક્ષા કરી હતી. તેમણે સંબંધિત વિભાગના અધિકારીઓ પાસેથી જરૂરી વિગતો મેળવી, રજૂઆતોનું નિયમોનુસાર અને સમયબદ્ધ રીતે નિરાકરણ આવે તે માટે સૂચનાઓ અને માર્ગદર્શન આપ્યાં હતાં. નાગરિકોની રજૂઆતોનું સંવેદનશીલતાથી નિરાકરણ લાવવા પણ તેમણે જણાવ્યું હતું.

જિલ્લા કક્ષાના સ્વાગત ફરિયાદ નિવારણ કાર્યક્રમનો મુખ્ય ઉદ્દેશ નાગરિકોની ફરિયાદો અને રજૂઆતોનું અસરકારક નિરાકરણ લાવી તેમને પારદર્શક અને જવાબદાર વહીવટનો અનુભવ કરાવવાનો છે.

બેઠકમાં જિલ્લા વિકાસ અધિકારી સી.એલ. પટેલ, નિવાસી અધિક કલેક્ટર ડૉ. મેહુલ બરાસરા સહિત સંબંધિત વિભાગોના અધિકારીઓ અને કર્મચારીઓ ઉપસ્થિત રહ્યા હતા.