તંત્રએ તહેવારોમાં ૪૫૫ એકમ તપાસ્યાં, ૨૫૧ સામે ગુના નોંધ્યા

ગાંધીનગર: ગ્રાહક સુરક્ષાને લગતી બાબતોના મંત્રી શ્રી રમણભાઈ સોલંકીની સૂચનાથી કાનૂની માપવિજ્ઞાન અને ગ્રાહક બાબતોની કચેરીએ નવરાત્રી તથા દશેરા દરમિયાન ગ્રાહકોને વજનમાં છેતરપિંડીથી બચાવવા સમગ્ર રાજ્યમાં તા.૧૬ અને તા.૧૭ ઓક્ટોબર, ૨૦૨૬ના રોજ વિશેષ તપાસ ઝુંબેશ હાથ ધરી હતી.

ઝુંબેશમાં મીઠાઈ, ફરસાણ અને ડ્રાયફ્રુટની દુકાનો સહિત ૪૫૫ જેટલા એકમોની તપાસ કરવામાં આવી હતી. ગેરરીતિ બદલ કુલ ૨૫૧ એકમો સામે ગુના નોંધી કાયદેસરની કાર્યવાહી કરાઈ હતી અને માંડવાળ ફી તરીકે અંદાજે રૂ.૫,૪૨,૦૦૦/- વસૂલવામાં આવ્યા હતા.

કાનૂની માપવિજ્ઞાન તંત્રના મદદનીશ નિયંત્રક અને ઇન્સ્પેક્ટરોએ મીઠાઈ, ફરસાણ, ડ્રાયફ્રુટ તથા ગિફ્ટ શોપ્સમાં કાયદા અને નિયમોની જોગવાઈઓનું પાલન થાય તે માટે તપાસ કરી હતી. તહેવારોમાં ગ્રાહકો આ ચીજવસ્તુઓની ખરીદી કરતા હોય છે અને વજનમાં છેતરાવાની શક્યતા રહેતી હોવાથી ગ્રાહક સુરક્ષા તથા જાગૃતિના હેતુથી ઝુંબેશ યોજાઈ હતી.

તપાસમાં ઓછું વજન આપવું, વજનકાંટાની ફેરચકાસણી/મુદ્રાંકન ન કરાવવું, ખરાઈ પ્રમાણપત્ર પ્રદર્શિત ન કરવું અને પેકર રજીસ્ટ્રેશન ન કરવું જેવી ગેરરીતિઓ સામે આવી હતી. તંત્રએ ગ્રાહકોના હિતોનું રક્ષણ કરવા, વજનમાપમાં પારદર્શિતા જાળવવા અને વેપારીઓ પાસે કાનૂની જોગવાઈઓનું પાલન કરાવવા પ્રયાસો કર્યા હતા. કોઈ વસ્તુનું ઓછું વજન આપવા અથવા MRPથી વધુ ભાવ લેવા અંગે ગ્રાહકો ગુજરાત રાજ્યની ટોલ-ફ્રી હેલ્પલાઇન 1800-233-0222 પર ફરિયાદ કરી શકે છે. ગ્રાહક ફરિયાદ અને માર્ગદર્શન માટે રાષ્ટ્રીય ગ્રાહક હેલ્પલાઇન 1915 (NCH)નો પણ સંપર્ક કરી શકાય છે, તેમ તંત્રએ જણાવ્યું હતું.