સરકારે ગ્રામસેવકોનું માસિક પ્રવાસ ભથ્થું રૂ. ૨,૭૦૦ કર્યું

ગાંધીનગર ખાતે મુખ્યમંત્રી શ્રી ભૂપેન્દ્રભાઈ પટેલની અધ્યક્ષતામાં યોજાયેલી રાજ્ય કેબિનેટની બેઠકમાં કૃષિ વિભાગ હેઠળ ફરજ બજાવતા ગ્રામસેવકોના માસિક પ્રવાસ ભથ્થામાં વધારો કરવાનો નિર્ણય લેવાયો છે. અગાઉ મળતા રૂ. ૧,૮૫૦ના ભથ્થામાં રૂ. ૮૫૦નો વધારો કરીને માસિક રૂ. ૨,૭૦૦ કરાયું છે.

પ્રવક્તા મંત્રી શ્રી જીતુભાઈ વાઘાણીએ જણાવ્યું કે રાજ્યમાં કૃષિ વિભાગ હેઠળ હાલ આશરે ૨,૯૦૦ જેટલા ગ્રામસેવકો કાર્યરત છે. સરેરાશ એક ગ્રામસેવકને પોતાના ફાળવેલા સેજામાં ૪ થી ૫ ગ્રામ પંચાયતોનાં ગામો અથવા અમુક વિસ્તારોમાં તેથી પણ વધુ ગામોમાં સતત ક્ષેત્રિય પ્રવાસ કરવાનો રહે છે. આ બાબતને ધ્યાને રાખીને ભથ્થામાં વધારો કરવાનો નિર્ણય કર્યો છે.

મંત્રીશ્રીએ જણાવ્યું કે ગ્રામ્ય કક્ષાએ ગ્રામસેવક રાજ્ય સરકાર અને ખેડૂતો વચ્ચેની કડીરૂપ પાયાનો કર્મચારી છે. ખેડૂતોને સરકારની વિવિધ યોજનાઓ અને સહાયનો લાભ સરળતાથી મળે તે માટે ગ્રામસેવકો નિષ્ઠાપૂર્વક કામગીરી કરી રહ્યા છે.

વર્તમાન સમયમાં તેમની કામગીરીનો વ્યાપ વધ્યો છે. પાકના વાવેતર તથા ઉત્પાદનના અંદાજ માટે મોબાઈલ એપ મારફતે ડિજિટલ સર્વે, પ્રધાનમંત્રી કિસાન સન્માન નિધિ યોજના હેઠળ e-KYC, કુદરતી આપત્તિ કે અતિવૃષ્ટિ સમયે ખેતરોમાં જઈ સર્વે અને ખેડૂતોને માર્ગદર્શન જેવી કામગીરી તેઓ કરે છે. કૃષિ મહોત્સવ/મેળાનું આયોજન, ટેકાના ભાવે ખરીદી અને પ્રાકૃતિક કૃષિ ઝુંબેશ માટે ગામડાંઓ તથા ખેતરો સુધી જઈ ખેડૂતોનો સતત સંપર્ક કરવો પણ અનિવાર્ય બન્યો છે.

રાજ્ય સરકારના આ નિર્ણયથી ક્ષેત્રિય કક્ષાએ કામ કરતા ગ્રામસેવકોની કામગીરી વધુ ઝડપી અને સુચારુ બનશે તથા તેનો સીધો લાભ રાજ્યના લાખો ખેડૂતોને મળશે, તેમ મંત્રીએ ઉમેર્યું હતું.