યુવકને માર મારવાના કેસમાં તત્કાલીન પીઆઈ કિરીટ લાઠિયા સામે ગુનો નોંધવા કોર્ટનો આદેશ

વડોદરામાં પોલીસ અત્યાચારના ગંભીર મામલે જ્યુડિશિયલ મેજિસ્ટ્રેટ ફર્સ્ટ ક્લાસ (JMFC) કોર્ટે મહત્વનો નિર્ણય લીધો છે. ગોરવા પોલીસ સ્ટેશનના તત્કાલીન પોલીસ ઇન્સ્પેક્ટર (PI) કિરીટ લાઠિયા સામે ગુનો નોંધવા અને કાયદાકીય કાર્યવાહી કરવા કોર્ટે હુકમ કર્યો છે.

સંદેશના અહેવાલ મુજબ, આ સમગ્ર ઘટના ૪-૧૧-૨૦૨૪ના રોજ બની હતી. ફરિયાદ પક્ષના વકીલ દર્શન પટેલે જણાવ્યું કે, મોઇન પઠાણ પોતાનું વાહન લઈને ઘરે જઈ રહ્યો હતો ત્યારે ૫ થી ૬ અજાણ્યા વ્યક્તિઓએ તેનો પીછો કરી તેની સાથે ગાળાગાળી કરી હતી. આ ઘટના અંગે મોઇને તેના મોટાભાઈ મહમ્મદ પઠાણને ફોન કર્યો હતો અને ત્યારબાદ પોલીસને જાણ કરવામાં આવી હતી. જોકે, ૧૫ મિનિટ સુધી પોલીસ ઘટનાસ્થળે ન પહોંચતા ડીસીપી કોઠિયાને જાણ કરવામાં આવી હતી.

ત્યારબાદ ગોરવાના તત્કાલીન પીઆઈ કિરીટ લાઠિયા પોતાની ખાનગી ગાડીમાં આવ્યા હતા અને મોઇન તથા તેના મોટાભાઈ મહમ્મદ પઠાણને પોલીસ સ્ટેશન લઈ ગયા હતા. આક્ષેપ છે કે પોલીસ સ્ટેશન પહોંચ્યા બાદ બંને ભાઈઓને આખી રાત ત્યાં જ રાખવામાં આવ્યા હતા અને તેમને માર મારવામાં આવ્યો હતો. એટલું જ નહીં, તેમને ખોટી રીતે પ્રોહિબિશનના ગુનામાં સંડોવવામાં આવ્યા હોવાનો પણ ગંભીર આરોપ લગાવવામાં આવ્યો છે.

આ મારપીટ દરમિયાન મોઇનખાન પઠાણને ગંભીર ઈજા થઈ હતી. દાવો કરવામાં આવ્યો છે કે માર મારવાને કારણે તેના કાનનો પડદો ફાટી ગયો હતો, જેના પરિણામે તેણે સાંભળવાની ક્ષમતા ગુમાવી દીધી છે. પીડિતોએ આ અત્યાચાર સામે ન્યાય મેળવવા માટે પોલીસ તંત્ર સમક્ષ રજૂઆત કરી હતી અને પોલીસ કમિશનરને પણ ફરિયાદ કરી હતી. પરંતુ, તેમની ફરિયાદના આધારે એફઆઈઆર નોંધવામાં ન આવતા પીડિતોએ અંતે કોર્ટના દ્વાર ખખડાવ્યા હતા અને પ્રાઇવેટ ફરિયાદ દાખલ કરી હતી.

મામલાની સુનાવણી કર્યા બાદ, વડોદરા JMFC કોર્ટે તત્કાલીન પીઆઈ કિરીટ લાઠિયા સામે ભારતીય ન્યાય સંહિતાની કલમ ૧૧૫(૨), ૧૧૭(૨) અને ૩૫૨ હેઠળ પ્રોસેસ ઇશ્યૂ કરવાનો આદેશ આપ્યો છે. કોર્ટના આ હુકમ બાદ હવે કિરીટ લાઠિયાને સમન્સ પાઠવવામાં આવશે. ૪ નવેમ્બરે કોર્ટે તેમની સામે ફોજદારી ફરિયાદની કાર્યવાહી કરવાનો આદેશ કર્યો છે.

કાયદાનું રક્ષણ કરવાની જવાબદારી ધરાવતા પોલીસ અધિકારી સામે જ કોર્ટ દ્વારા કાયદાકીય કાર્યવાહીનો આદેશ આપવામાં આવતા પોલીસ વિભાગમાં ચર્ચા જાગી છે. હવે આ મામલે આગામી કોર્ટ કાર્યવાહી અને તત્કાલીન પીઆઈ કિરીટ લાઠિયાનો પક્ષ શું રહેશે તેના પર સૌની નજર છે.