પાટણ સાયન્સ સેન્ટરમાં પાંચ દિવસીય ડ્રોન મેકિંગ તાલીમ કાર્યક્રમનું સમાપન

પાટણ ખાતે સ્થિત રિજિયોનલ સાયન્સ સેન્ટરમાં ગુજકોસ્ટ દ્વારા આયોજિત પાંચ દિવસીય નિઃશુલ્ક 'ફંડામેન્ટલ્સ ઓફ ડ્રોન મેકિંગ' તાલીમ કાર્યક્રમનું સફળતાપૂર્વક સમાપન થયું છે. ગુજરાત સરકારના વિજ્ઞાન અને ટેકનોલોજી વિભાગ હેઠળ કાર્યરત ગુજકોસ્ટ અને રાષ્ટ્રીય રક્ષા યુનિવર્સિટી ગાંધીનગરના સંયુક્ત ઉપક્રમે આ તાલીમ કાર્યક્રમનું આયોજન કરવામાં આવ્યું હતું.

આ તાલીમ કાર્યક્રમ દરમિયાન સહભાગીઓને ડ્રોન ટેકનોલોજીના વિવિધ પાસાઓ વિશે ઊંડાણપૂર્વક માહિતી આપવામાં આવી હતી. તાલીમમાં ડ્રોન ટેકનોલોજીના મૂળભૂત સિદ્ધાંતો, ડ્રોનની એસેમ્બલી અને તેની બનાવટ, એરોડાયનેમિક્સ, ફ્લાઈટ ઓપરેશન્સ, ય્ઝી, એવિઓનિક્સ, ફ્લાઈટ કંટ્રોલર, ડ્રોન ટેસ્ટિંગ અને કેલિબ્રેશન જેવા મહત્વના વિષયોનો સમાવેશ કરવામાં આવ્યો હતો. સહભાગીઓને આ વિષયોનું માત્ર થિયરી જ નહીં પરંતુ પ્રાયોગિક જ્ઞાન પણ આપવામાં આવ્યું હતું.

પાટણ સાયન્સ સેન્ટરમાં આયોજિત આ તાલીમ કાર્યક્રમના અંતે સહભાગીઓના જ્ઞાન અને કૌશલ્યનું મૂલ્યાંકન કરવા માટે એક પરીક્ષા લેવામાં આવી હતી. આ પરીક્ષામાં સહભાગીઓએ સરેરાશ ૭૨.૪૦ ટકા પરિણામ મેળવ્યું હતું. પરીક્ષામાં ઉત્કૃષ્ટ પ્રદર્શન કરીને વિજેતા બનનાર સહભાગીઓમાં વ્યાસ અંશ, કલ્પેશકુમાર, પટેલ મિહિરકુમાર રોહિતભાઈ અને યશ પ્રજાપતિના નામ સામેલ છે. કાર્યક્રમના સમાપન પ્રસંગે તમામ સહભાગીઓને તાલીમ પૂર્ણ કર્યાના પ્રમાણપત્રો એનાયત કરવામાં આવ્યા હતા.

સાયન્સ સેન્ટરના પ્રોજેક્ટ ડિરેક્ટર ડો. સુમિત શાસ્ત્ર્રીએ આ પ્રસંગે જણાવ્યું હતું કે આજના આધુનિક ટેકનોલોજીના યુગમાં ડ્રોન ટેકનોલોજીનું મહત્વ સતત વધી રહ્યું છે. તેમણે વધુમાં ઉમેર્યું હતું કે કૃષિ, સંરક્ષણ, સર્વેક્ષણ, આપત્તિ વ્યવસ્થાપન, ઉદ્યોગ અને અન્ય અનેક ક્ષેત્રોમાં ડ્રોનનો ઉપયોગ ઝડપથી વિસ્તરી રહ્યો છે.

રિજિયોનલ સાયન્સ સેન્ટર એ ગુજરાત સરકારના વિજ્ઞાન અને ટેકનોલોજી વિભાગ હેઠળ કાર્યરત સંસ્થા છે, જે પાટણમાં સ્થાપિત કરવામાં આવી હતી. તે વિજ્ઞાન પ્રત્યે જાગૃતિ લાવવા માટે વિવિધ પ્રાયોગિક અને તાલીમલક્ષી કાર્યક્રમોનું આયોજન કરે છે.