સાયબર ગુના બાદ બેંક ખાતા અનિશ્ચિત સમય માટે ફ્રીઝ ન કરવા અલ્હાબાદ હાઈકોર્ટની સૂચના

સાયબર ગુનેગારો દ્વારા વ્યક્તિગત વિગતોનો દુરુપયોગ કરવામાં આવતા, તેના કારણે નિર્દોષ નાગરિકોના બેંક ખાતા અનિશ્ચિત સમય માટે ફ્રીઝ કરી દેવામાં આવતા અલ્હાબાદ હાઈકોર્ટે ગંભીર ચિંતા વ્યક્ત કરી છે. બિઝનેસ સ્ટાન્ડર્ડના અહેવાલ મુજબ, લખનૌ બેંચના જસ્ટિસ રાજન રોય અને સુભાષ વિદ્યાર્થીએ ગુનાખોરીના ભોગ બનેલા નાગરિકોને આ પ્રકારના સંકટમાં ન મુકાય તે માટે કેન્દ્ર સરકારને અસરકારક વ્યવસ્થા ઊભી કરવા જણાવ્યું છે.

આ કેસ એક બિલ્ડર દ્વારા દાખલ કરવામાં આવેલી અરજી સાથે જોડાયેલો છે, જેમના બેંક ખાતા લાંબા સમયથી ફ્રીઝ રાખવામાં આવ્યા છે. અરજદારે કોર્ટમાં જણાવ્યું હતું કે તેમના પુત્રે અજાણતામાં સાયબર ગુનેગાર દ્વારા મોકલવામાં આવેલી એક લિંક પર ક્લિક કર્યું હતું, જેના કારણે આધાર કાર્ડની વિગતો અને અન્ય અંગત માહિતી શેર થઈ ગઈ હતી. ત્યારબાદ ગુનેગરોએ આ વિગતોનો ઉપયોગ અન્ય નાગરિકો સાથે બેંક વ્યવહાર દ્વારા છેતરપિંડી કરવા માટે કર્યો હતો. આ પરિણામે, અરજદારના તમામ બેંક ખાતા ફ્રીઝ કરી દેવામાં આવ્યા હતા, જેનાથી તેમના વ્યવસાયિક કામકાજ પર ગંભીર અસર પડી હતી.

અરજદારે આ બાબતે વર્ષ ૨૦૨૦માં એફઆઈઆર પણ નોંધાવી હતી. અગાઉ, તેમણે પોતાના સેવિંગ્સ એકાઉન્ટને અનફ્રીઝ કરવા માટે હાઈકોર્ટનો સંપર્ક કર્યો હતો. તે સમયે કોર્ટે તેમને જૂના આધાર કાર્ડને રદ કરવા અને નવું કાર્ડ મેળવવા માટે UIDAI નો સંપર્ક કરવાની મંજૂરી આપી હતી. ત્યારબાદ નવા બાયોમેટ્રિક્સ લેવામાં આવ્યા અને મોબાઈલ નંબર પણ બદલવામાં આવ્યો હતો, પરંતુ આ પગલાં છતાં તેમના બેંક ખાતા ફ્રીઝ જ રહ્યા હતા.

બેંકોએ કોર્ટને જાણ કરી હતી કે તેઓએ સાયબર સેલનો સંપર્ક કર્યો હતો, પરંતુ સાયબર સેલ તરફથી કોઈ સૂચના ન મળવાને કારણે ખાતા ફ્રીઝ કરવાની પ્રક્રિયા અટકી પડી હતી. આ સંદર્ભે બેંચે સંબંધિત બેંકોને નિર્દેશ આપ્યો છે કે તેઓ પેન્ડિંગ ક્રિમિનલ કેસોની સ્થિતિ જાણવા માટે સાયબર સેલ સત્તાધિકારીઓનો સંપર્ક કરે અને કાયદા મુજબ યોગ્ય કાર્યવાહી કરે. સાથે જ આ બાબતનો ઉકેલ લાવવા માટે તમામ પ્રયાસો કરવા જણાવ્યું છે.

કોર્ટે કેન્દ્ર સરકારને આ પ્રકારના કિસ્સાઓ માટે ઉકેલ લાવવા સૂચવ્યું છે જ્યાં નિર્દોષ નાગરિકો સાયબર ગુનેગારોના જાળમાં ફસાય છે અને તેમની વિગતોનો ઉપયોગ ગુના કરવા માટે થાય છે. કોર્ટે ડેપ્યુટી સોલિસિટર જનરલ એસબી પાંડેને સૂચના આપી છે કે તેઓ જરૂરી સૂચનાઓ મેળવીને સોગંદનામું રજૂ કરે. આ કેસમાં ગૃહ મંત્રાલયને પક્ષકાર બનાવવામાં આવ્યું છે અને અરજદારને એડિશનલ ચીફ સેક્રેટરી (હોમ), લખનૌ પોલીસ કમિશનર અને વિભૂતિ ખંડ પોલીસ સ્ટેશનના એસએચઓને પણ પક્ષકાર બનાવવાનો નિર્દેશ આપવામાં આવ્યો છે. આ મામલે હવે ચાર અઠવાડિયા પછી સુનાવણી થશે.