ફ્લાઇટમાં નશાની હાલતમાં મહિલાએ કપડાં ઉતાર્યા, વિમાન ડાયવર્ટ કરવું પડ્યું

બર્મિંગહામથી ફ્લોરિડા જઈ રહેલી એક ફ્લાઇટમાં નશાની હાલતમાં એક મહિલા મુસાફરે ભારે હોબાળો મચાવ્યો હતો. આ ઘટના એટલી ગંભીર બની હતી કે સુરક્ષાના કારણોસર આખું વિમાન ડાયવર્ટ કરવું પડ્યું હતું. આ ઘટનામાં સામેલ ૩૦ વર્ષીય મહિલા સારા પાર્કર હવે જેલની સજા ભોગવી શકે છે, કારણ કે આ મામલો હાલ કોર્ટમાં છે અને ટૂંક સમયમાં જ તેને સજા સંભળાવવામાં આવી શકે છે.

આજતક દ્વારા આપવામાં આવેલી માહિતી મુજબ, આ ઘટના ગયા વર્ષે જુલાઈ મહિનામાં બની હતી. સારા પાર્કર નામની આ મહિલા જ્યારે બર્મિંગહામ એરપોર્ટથી ફ્લાઇટમાં ચઢી ત્યારે તે પહેલેથી જ દારૂના નશામાં હતી. વિમાન જ્યારે ટેક-ઓફ કરી રહ્યું હતું, ત્યારે તેને પોતાની સીટ પર રહેવાની સખત સૂચના આપવામાં આવી હતી, તેમ છતાં તે બાથરૂમનો ઉપયોગ કરવા માટે પોતાની સીટ પરથી ઉભી થઈ ગઈ હતી.

જ્યારે કેબિન સ્ટાફે તેને વિમાનના નિયમો સમજાવવાનો પ્રયાસ કર્યો, ત્યારે તે સ્ટાફ પર ગુસ્સે થઈ ગઈ હતી. ત્યારબાદ તેણે અચાનક પોતાના શોર્ટ્સ અને અન્ડરવેર ઉતારવાનું શરૂ કર્યું હતું. તે વિમાનની સીટો વચ્ચેના પેસેજમાં ઉભી રહી ગઈ હતી, જ્યાંથી ફ્લાઇટના તમામ મુસાફરો તેને જોઈ શકતા હતા. કપડાં ઉતાર્યા બાદ તે નીચે બેસી ગઈ હતી અને અન્ય મુસાફરોની સામે અશ્લીલ ઈશારા કરવા લાગી હતી તેમજ ગેરવર્તણૂક શરૂ કરી દીધી હતી.

ડેલી સ્ટારના અહેવાલ મુજબ, ચાર્જ ડોક્યુમેન્ટમાં જણાવવામાં આવ્યું છે કે આ મહિલા વેસ્ટ યોર્કશાયરના હેલિફેક્સની રહેવાસી છે. આ દસ્તાવેજોમાં તેની સામે અનેક ગંભીર આરોપો લગાવવામાં આવ્યા છે. જ્યારે તેને મેનચેસ્ટર મેજિસ્ટ્રેટ કોર્ટમાં રજૂ કરવામાં આવી, ત્યારે તેણે પોતાની પરના ત્રણ મુખ્ય આરોપો સ્વીકારી લીધા હતા. આ આરોપોમાં જાહેર જગ્યાએ અશ્લીલ હરકતો કરવી, વિમાનમાં નશાની હાલતમાં હોવું અને પાયલટ દ્વારા આપવામાં આવેલી સુરક્ષા સૂચનાઓનું પાલન ન કરવુંનો સમાવેશ થાય છે.

મંગળવારે કોર્ટે સ્વીકાર્યું હતું કે આ ઘટના અત્યંત ગંભીર છે. મેજિસ્ટ્રેટ કોર્ટે નોંધ્યું હતું કે તેમની પાસે આટલી ગંભીર ઘટના માટે પૂરતી સજા આપવાની સત્તા નથી. આથી, બુધવારે આ કેસને સજા સંભળાવવા માટે મેનચેસ્ટરની મિનશુલ સ્ટ્રીટ ક્રાઉન કોર્ટમાં મોકલવામાં આવ્યો હતો. આ મામલે ૧ ડિસેમ્બરના રોજ સુનાવણી થવાની છે, જેમાં મહિલાને જેલની સજા થઈ શકે છે.

કોર્ટમાં જજે પોતાની ટિપ્પણી કરતા જણાવ્યું હતું કે મુસાફરોથી ભરેલી ફ્લાઇટમાં પોતાની જાતને ખુલ્લી કરવી (એક્સપોઝ કરવું) એ ખૂબ જ ગંભીર બાબત છે. કોર્ટને જણાવવામાં આવ્યું હતું કે તે મુસાફરોની સામે પોતાના પ્રાઈવેટ પાર્ટ્સ બતાવી રહી હતી. આ સમગ્ર અરાજકતાને કારણે ફ્લાઇટને મેનચેસ્ટર એરપોર્ટ પર ડાયવર્ટ કરવી પડી હતી. આ ઘટનાને કારણે એરલાઇનને આર્થિક રીતે પણ મોટું નુકસાન થયું હતું.

આ ઘટનાએ ફ્લાઇટના તમામ મુસાફરોને ચોંકાવી દીધા હતા, કારણ કે મહિલાએ નશાની હાલતમાં વિમાનની અંદર જ અશ્લીલતા ફેલાવી હતી. હવે ક્રાઉન કોર્ટ દ્વારા ૧ ડિસેમ્બરે કરવામાં આવનાર સુનાવણી બાદ નક્કી થશે કે તેને કેટલી સજા આપવામાં આવશે.