મધર ડેરીમાં નોકરી અપાવવાની લાલચે ૨૦ વધુ લોકો સાથે ઠગાઈ

જૂનાગઢના ગાંધીગ્રામ વિસ્તારમાં રહેતા પિતા-પુત્રે પોતાને મધર ડેરીના એજન્ટ હોવાનું જણાવી લોકોને નોકરી અપાવવાની લાલચ આપી પૈસા પડાવ્યા હતા. સંદેશના અહેવાલ મુજબ, આ કેસમાં શરૂઆતમાં ખામધ્રોળ રોડ પર રહેતા દેવલ વિજયભાઈ પરજીયાએ ફરિયાદ કરી હતી કે અશોક ભાણજી વાઢેર અને પ્રશાંત અશોક વાઢેરે તેમને નોકરીનો વિશ્વાસ આપી ₹૩૯,૬૦૮ રોકડા અને દસ્તાવેજો લીધા હતા, પરંતુ નોકરી અપાવી ન હતી.

સી ડિવીઝન પોલીસમાં નોંધાયેલા આ કેસમાં પીએસઆઈ એચ.બી.ચૌહાણે તપાસ કરી હતી. જ્યારે ડીવાયએસપી હિતેશ ધાંધલીયાએ લોકોને જાગૃત રહેવાની અપીલ કરી, ત્યારે વધુ ૨૦ જેટલા ભોગ બનનારાઓએ પોલીસનો સંપર્ક કર્યો હતો. આ તમામ લોકો પાસેથી પણ નોકરી અપાવવાના બહાને નાણાં લેવામાં આવ્યા હોવાનું સામે આવ્યું છે.

પોલીસે આરોપીઓના ઘરે સર્ચ કરતા ડેરીનો નકલી સિક્કો, વિવિધ વ્યક્તિઓના આધારકાર્ડ, પાનકાર્ડ, ચુટણીકાર્ડ, કોરા ચેક, કલર ફોટોગ્રાફ્સ અને કેટલાક લખાણો મળી આવ્યા હતા. પોલીસે આ તમામ સામગ્રી કબજે કરી બંને આરોપીઓ સામે કોર્ટમાં ચાર્જશીટ રજૂ કરી છે.