ગિરનાર લીલી પરિક્રમા માટે વહીવટી તંત્ર અને સાધુ સંતોનું રૂટ નિરીક્ષણ

ગિરનારની પવિત્ર લીલી પરિક્રમા માટે વહીવટી તંત્ર દ્વારા પૂર્વ તૈયારીઓ તેજ કરવામાં આવી રહી છે. પરિક્રમામાં આવતા લાખો શ્રદ્ધાળુઓની સુવિધાઓ સુનિશ્ચિત કરવા માટે આજે જૂનાગઢના સાધુ-સંતો, પદાધિકારીઓ અને જિલ્લા વહીવટી તંત્રના અધિકારીઓએ સંયુક્ત રીતે પરિક્રમાના માર્ગનું નિરીક્ષણ કર્યું હતું.

આ નિરીક્ષણ દરમિયાન પીવાના પાણીની વ્યવસ્થા, આરોગ્ય સેવાઓ, અન્નક્ષેત્રો, લાઇટિંગ અને સેવાભાવી સંસ્થાઓ વિશે વિગતવાર ચર્ચા કરવામાં આવી હતી. ઓછા વરસાદને કારણે પાણીની સમસ્યા ન સર્જાય તે માટે બોરવેલ દ્વારા પાણીની સુવિધા વધારવા પર વિશેષ ભાર મૂકવામાં આવ્યો હતો. સાધુ-સંતોએ તંત્રની તૈયારીઓ સામે સંતોષ વ્યક્ત કર્યો હતો. સાથે જ, માર્ગ કઠિન હોવાથી અશક્તો, બાળકો અને વયોવૃદ્ધો પરિક્રમા ટાળે તેવો અનુરોધ પણ સાધુઓએ કર્યો હતો. ભાવિકોને પ્રતિબંધિત પ્લાસ્ટિકની વસ્તુઓનો ઉપયોગ ન કરવા પણ સૂચના આપવામાં આવી હતી.

આ પ્રક્રિયામાં સાંસદ રાજેશ ચુડાસમા, મેયર ધર્મેશ પોશિયા, ધારાસભ્ય સંજય કોરડીયા, કલેક્ટર યોગેશ ચૌધરી, કમિશનર આઈ.આર. વાળા, પોલીસ વડા સુબોધ ઓડેદરા, નાયબ વન સંરક્ષક અક્ષય જોશી અને અધિક કલેક્ટર બી.એસ. બારડ સહિતના અધિકારીઓ જોડાયા હતા. ગિરનાર તીર્થક્ષેત્રના ઇન્દ્રભારતી બાપુ, મહેશગીરી બાપુ, મહેન્દ્રાનંદગીરી બાપુ, મહાદેવગીરીબાપુ અને કિશનદાસ બાપુ જેવા સાધુઓ પણ હાજર રહ્યા હતા.