૫૦ વર્ષથી વધુ ઉંમરની મહિલાની સરુગસી માટેની અરજી દિલ્હી હાઈકોર્ટે ફગાવી

દિલ્હી હાઈકોર્ટે એક દંપતીને સરુગસી માટે નિર્ધારિત વય મર્યાદામાંથી મુક્તિ આપવાની માંગણી કરતી અરજી ફગાવી દીધી છે. જસ્ટિસ અમિત મહાજનની બેન્ચે ૨ નવેમ્બરના રોજ આપેલા આદેશમાં સ્પષ્ટ કર્યું હતું કે, સહાનુભૂતિ ગમે તેટલી સાચી હોય, પરંતુ તે કાયદાકીય પાત્રતાનો વિકલ્પ બની શકે નહીં.

હિન્દુસ્તાન ટાઈમ્સના અહેવાલ મુજબ, આ કેસમાં દંપતીએ ૬ ફેબ્રુઆરી, ૨૦૨૫ના રોજ પ્રથમવાર ક્લિનિકનો સંપર્ક કર્યો હતો. તે સમયે મહિલાની ઉંમર આશરે ૪૯ વર્ષ અને સાત મહિના હતી. પ્રથમ પરામર્શના ચાર દિવસ બાદ, ડોક્ટરો દ્વારા ડોનરના ઉપયોગ દ્વારા જેસ્ટેશનલ સરુગસીની ભલામણ કરવામાં આવી હતી.

જોકે, જુલાઈ ૨૦૨૫માં જ્યારે મહિલા વંધ્યત્વની સારવાર લઈ રહી હતી, ત્યારે તેની ઉંમર ૫૦ વર્ષની નિર્ધારિત મર્યાદા વટાવી ગઈ હતી. સરુગસી (રેગ્યુલેશન) એક્ટ, ૨૦૨૧ની કલમ ૪(iii)(c)(I) હેઠળ મહિલા માટેની મહત્તમ વય મર્યાદા ૫૦ વર્ષ નક્કી કરવામાં આવી છે.

આ દંપતીએ હાઈકોર્ટમાં એવી દલીલ કરી હતી કે જ્યારે તેઓ સરુગસીની પ્રક્રિયા શરૂ કરવા માટે જરૂરી પગલાં લઈ રહ્યા હતા, તે દરમિયાન જ મહિલાની ઉંમર નિર્ધારિત મર્યાદાથી વધી ગઈ હતી. તેથી તેમને આ વય મર્યાદામાંથી મુક્તિ આપવામાં આવે તેવી વિનંતી કરી હતી.

કોર્ટે સ્વીકાર્યું કે માતૃત્વની આકાંક્ષાઓ અત્યંત વ્યક્તિગત હોય છે અને નિષ્ફળ ફળદ્રુપતા સારવાર સાથે જોડાયેલ ભાવનાત્મક તણાવ ઊંડો હોય છે. તેમ છતાં, કોર્ટે અરજી ફગાવી દીધી કારણ કે સરુગસીની પ્રક્રિયા શરૂ થાય તે પહેલા જ મહિલાએ વય મર્યાદા વટાવી દીધી હતી.

ન્યાયાધીશે વધુમાં નોંધ્યું કે ૬ ફેબ્રુઆરીના પ્રથમ પરામર્શ દરમિયાન જ દંપતીને જાણ કરવામાં આવી હતી કે મહિલા વય મર્યાદા પૂર્ણ કરવાથી માત્ર પાંચ મહિના દૂર છે. તેમ છતાં, દંપતીએ વય મર્યાદા વટાવ્યા પછી જ કોર્ટનો સંપર્ક કર્યો હતો. ન્યાયિક હસ્તક્ષેપ મેળવવામાં થયેલા આ વિલંબ માટે દંપતી કોઈ સંતોષકારક ખુલાસો આપી શક્યું ન હતું. અંતે, કોર્ટે જણાવ્યું કે મામલાનો નિર્ણય ગવર્નિંગ સ્ટેચ્યુટરી ફ્રેમવર્ક મુજબ જ કરવો જરૂરી છે.