પહેલાથી મતદાર હોય તો પણ ફોર્મ ૬ કેમ ભરવું પડે છે? સુપ્રીમ કોર્ટના સવાલ

દિલ્હીમાં મતદાર યાદીના સ્પેશિયલ ઇન્ટેન્સિવ રિવિઝન (SIR) દરમિયાન જે લોકોના નામ ડ્રાફ્ટ લિસ્ટમાં નથી આવ્યા, તેમને નવા મતદારો માટેના ફોર્મ ૬ કેમ ભરવા માટે મજબૂર કરવામાં આવે છે? સુપ્રીમ કોર્ટે ચૂંટણી પંચને આ પ્રશ્ન પૂછ્યો છે. લાઈવ લો અને બાર એન્ડ બેન્ચના અહેવાલ મુજબ, ચીફ જસ્ટિસ સૂર્યકાંતની બેન્ચે પારદર્શિતાના અભાવ અંગેની અરજી પર સુનાવણી દરમિયાન આ સવાલ ઉઠાવ્યા હતા.

કોર્ટે અવલોકન કર્યું કે ફોર્મ ૬ એ પ્રથમ વખત નોંધણી માટે છે, જ્યારે ફોર્મ ૮ એ નામ કે સરનામાં સુધારવા માટે છે. જો કોઈ વ્યક્તિનું સરનામું બદલાયું હોય, તો તેને ફોર્મ ૮ દ્વારા સુધારો કરવાની તક કેમ નથી આપવામાં આવતી? જસ્ટિસ જોયમાલ્યા બાગચીએ જણાવ્યું કે મતાધિકાર એ અત્યંત મહત્વનો અધિકાર છે અને તેને આટલી સરળતાથી છીનવી શકાય નહીં. તેમણે પ્રક્રિયામાં રહેલી 'સ્ટ્રક્ચરલ અસંગતિ' અંગે પણ વાત કરી.

અરજદારોના વકીલ પ્રશાંત ભૂષણના જણાવ્યા મુજબ, ડ્રાફ્ટ લિસ્ટમાંથી અંદાજે ૪૩ લાખ લોકોને બહાર કરવામાં આવ્યા છે. આ લોકો જૂની યાદીમાં હતા પરંતુ સરનામું બદલાવા કે અન્ય કારણોસર એન્યુમેરેશન ફોર્મ ભરી શક્યા નહોતા. ચૂંટણી પંચ તરફથી વરિષ્ઠ વકીલ દામ શેશાદ્રી નાયડુએ જણાવ્યું કે SIR એ સતત વિકસતી પ્રક્રિયા છે અને ચિંતાઓ દૂર કરવા પગલાં લેવામાં આવી રહ્યા છે.