AI દ્વારા નિર્મિત પુસ્તકોની ખરીદી મામલે DMK નેતાએ FIR માટે અરજી કરી

દ્રવિડ મુન્નેત્ર કઝગમ (DMK) લીગલ વિંગના જોઈન્ટ સેક્રેટરી આઈ. પરંતમેને મદ્રાસ હાઈકોર્ટમાં એક રિટ પિટિશન દાખલ કરી છે. ધ હિંદુના અહેવાલ મુજબ, તેમણે ડિરેક્ટોરેટ ઓફ વિજિલન્સ એન્ડ એન્ટી કરપ્શન (DVAC) ને આદેશ આપવાની માંગ કરી છે કે કોઈમ્બતુરની પરિયાર અરિવુલગમ લાઈબ્રેબરી માટે પુસ્તકોની ખરીદીમાં થયેલી કથિત ગેરરીતિઓ અંગે તેમની ફરિયાદના આધારે પ્રથમ માહિતી અહેવાલ (FIR) નોંધવામાં આવે.

પરંતમેને એડવોકેટ એ. દામોદરન દ્વારા ફાઇલ કરેલા સોગંદનામામાં જણાવ્યું છે કે, તમિલનાડુ સરકાર દ્વારા વિદ્યાર્થીઓ અને સંશોધકો માટે એક મુખ્ય જ્ઞાન કેન્દ્ર તરીકે પરિયાર અરિવુલગમની કલ્પના કરવામાં આવી હતી, જેમાં લાઈબ્રેરી અને સાયન્સ સેન્ટરનો સમાવેશ થાય છે. આ કેન્દ્ર કુલ ₹૩૦૦ કરોડના ખર્ચે સ્થાપિત કરવામાં આવ્યું હતું. જેમાં સિવિલ કન્સ્ટ્રક્શન માટે ₹૨૪૫ કરોડ, પુસ્તકોની ખરીદી માટે ₹૫૦ કરોડ અને આઈટી ઈન્ફ્રાસ્ટ્રક્ચર માટે ₹૫ કરોડનો ખર્ચ કરવામાં આવ્યો હતો.

સરકારે ૫ નવેમ્બર, ૨૦૨૫ના રોજ લાઈબ્રેરી માટે ખરીદવાના પુસ્તકોના શીર્ષકો નક્કી કરવા માટે ૧૧૨ સભ્યોની પુસ્તક ભલામણ સમિતિની રચના કરી હતી. પુસ્તકોની પસંદગી માટે ૯ જાન્યુઆરી, ૨૦૨૬ના રોજ બેઠક યોજાઈ હતી અને ૨ ફેબ્રુઆરી, ૨૦૨૬ના રોજ ખરીદીના ઓર્ડર આપવામાં આવ્યા હતા. ૧૬ ઓક્ટોબર, ૨૦૨૬ના રોજ લાઈબ્રેરીનું ઉદઘાટન કરવામાં આવ્યું હતું, જેના પછી પુસ્તકોની ગુણવત્તા અંગે મોટો વિવાદ સર્જાયો હતો.

પુસ્તક ભલામણ સમિતિના સભ્ય અને જાણીતા લેખક પરુમલ મુરુગને ૬ નવેમ્બર, ૨૦૨૬ના રોજ એક લેખ લખ્યો હતો. જેમાં તેમણે ધ્યાન દોર્યું હતું કે લાઈબ્રેરી કાલ્પનિક લેખકોના નામ ધરાવતા "AI જનરેટેડ" પુસ્તકોથી ભરેલી છે. તેમણે વધુમાં જણાવ્યું હતું કે આ પુસ્તકોમાં ખોટી ઐતિહાસિક અને તથ્યાત્મક માહિતી છે અને તેની કિંમત અન્ય સમાન પ્રકાશનો કરતા ઘણી વધારે રાખવામાં આવી છે.

પરંતમેને તેમની ફરિયાદમાં જણાવ્યું છે કે અગલવિલક્કુ પબ્લિકેશન્સ અને ફિનિક્સ પબ્લિકેશન્સે વાસ્તવિક લેખકો દ્વારા લખાયેલા પુસ્તકોને બદલે AI ટૂલ્સનો ઉપયોગ કરીને બનાવેલા પુસ્તકો પૂરા પાડ્યા હોય તેવું જણાય છે. તેમણે ઉમેર્યું કે આ પુસ્તકો માટેના ઇન્ટરનેશનલ સ્ટાન્ડર્ડ બુક નંબર્સ (ISBN) દરેક પુસ્તક માટે અલગથી મેળવવાને બદલે બલ્ક બ્લોક્સમાં મેળવવામાં આવ્યા હોય તેમ લાગે છે. તેમણે કહ્યું કે, "આ પ્રકારનું આઉટપુટ માનવીય રીતે અશક્ય છે અને તેનાથી શંકા ઉભી થાય છે કે આવા લેખકોનું અસ્તિત્વ છે કે નહીં."

પરંતમેને ૭ નવેમ્બર, ૨૦૨૬ના રોજ DVAC માં ફરિયાદ નોંધાવી હતી, પરંતુ તેમણે ફરિયાદ કરી છે કે DVAC એ તેમની ફરિયાદ પર FIR નોંધ્યો નથી કે તેમને પ્રાથમિક તપાસ વિશે જાણ કરી નથી. તેમણે આગ્રહ કર્યો છે કે DVAC તાત્કાલિક કેસ નોંધે અને પુસ્તક ખરીદી સંબંધિત તમામ સત્તાવાર દસ્તાવેજો જપ્ત કરે જેથી તેમાં ફેરફાર ન કરી શકાય, તે ખોવાય નહીં અથવા તેનો નાશ ન થાય.

બીજી તરફ, મદ્રુઈ બેન્ચમાં જસ્ટિસ જી.આર. સ્વામિનાથન અને જસ્ટિસ એમ.ડી. સુમતિની ખંડપીઠ સમક્ષ મંગળવાર (૧૦ નવેમ્બર, ૨૦૨૬) ના રોજ સ્ટેટ પબ્લિક પ્રોસિક્યુટર આર. જોન સત્યન જણાવ્યું હતું કે, શાળા શિક્ષણ વિભાગ દ્વારા ૬ નવેમ્બર, ૨૦૨૬ના રોજ કરવામાં આવેલી ફરિયાદના આધારે DVAC એ ૭ નવેમ્બર, ૨૦૨૬ના રોજ આ મુદ્દે 'વિગતવાર તપાસ' શરૂ કરી છે.

જસ્ટિસ સ્વામિનાથને સ્ટેટ પબ્લિક પ્રોસિક્યુટરને જણાવ્યું હતું કે DVAC મેન્યુઅલ હેઠળ નિર્ધારિત 'વિગતવાર તપાસ' વહેલી તકે પૂર્ણ કરી તાત્કાલિક FIR નોંધાવી શકે છે. તેમણે નોંધ્યું કે રેકોર્ડ્સ તપાસીને જાહેર લાઈબ્રેરી માટે શંકાસ્પદ "AI જનરેટેડ" પુસ્તકોની ખરીદી માટે જવાબદાર સરકારી અધિકારીઓ અને અન્ય વ્યક્તિઓના નામ શોધવામાં બહુ સમય નહીં લાગે.