ગગન નારંગ, વિજેન્દર સિંહ અને યોગેશ્વર દત્ત નિર્વિવાદ ચૂંટાયા

ઇન્ડિયન ઓલિમ્પિક એસોસિએશન (IOA) ની ૫ ડિસેમ્બરના રોજ યોજાનારી ચૂંટણીઓ પહેલાં ઓલિમ્પિક મેડલિસ્ટ ગગન નારંગ, વિજેન્દર સિંહ અને યોગેશ્વર દત્ત તેમજ ટેબલ ટેનિસના પૂર્વ ખેલાડી કમલેશ મહેતા પુરુષ સ્પોર્ટ્સપર્સન્સ ઓફ આઉટસ્ટેન્ડિંગ મેરિટ (SOM) તરીકે નિર્વિવાદ ચૂંટાયા છે.

સ્પોર્ટસ્ટારના અહેવાલ મુજબ, શનિવારે બપોરે ૨ વાગ્યાની સમયમર્યાદા પહેલાં આઠ ઉમેદવારોએ પોતાનું નામ પાછું ખેંચી લીધું હતું. જેના કારણે સોમવારે યોજાનારી પુરુષ SOM ની ચૂંટણીની જરૂર રહી નથી અને આ ચારેય વ્યક્તિઓએ પોતાની જગ્યા સુરક્ષિત કરી છે.

બીજી તરફ, મહિલા SOM ની ચાર બેઠકો માટે હજુ પણ સ્પર્ધા ચાલુ છે. આ માટે કુલ છ ઉમેદવારો મેદાનમાં છે, જેમાં વર્તમાન IOA પ્રમુખ પી.ટી. ઉષા, ઓલિમ્પિક મેડલિસ્ટ સાઈના નેહવાલ, વર્લ્ડ ચેમ્પિયનશિપમાં બ્રોન્ઝ મેડલ જીતનાર અંજુ બોબી જ્યોર્જ, હોકીના પૂર્વ કેપ્ટન રાણી રમ્પલ, પૂર્વ આર્ચર ડોલા બેનર્જી અને બાસ્કેટબોલ ખેલાડી અનિતા પોલ દુરાઈનો સમાવેશ થાય છે. ઇલેક્ટોરલ ઓફિસર સંજય કુમાર શ્રીવાસ્તવે પુષ્ટિ કરી છે કે આ ચૂંટણી ૯ નવેમ્બરના રોજ વર્ચ્યુઅલ રીતે યોજવામાં આવશે.

પુરુષ શ્રેણીમાં નામ પાછું ખેંચનારા આઠ ઉમેદવારોમાં વર્લ્ડ એથ્લેટિક્સના વાઇસ પ્રેસિડેન્ટ અદિલે સુમારીવાલા, ટેબલ ટેનિસના દિગ્ગજ અચંતા શરથ કમલ, પૂર્વ શટલર બી. સાઈ પ્રનીથ, વેઇટલિફ્ટર સતીશ કુમાર શિવલિંગમ, ઓલિમ્પિક હોકી ગોલ્ડ મેડલિસ્ટ સુરિન્દર સિંહ શોકર અને પૂર્વ શૂટર્સ રોનજન સોઢી, મનશેર સિંહ અને મુરાદ અલી ખાનનો સમાવેશ થાય છે. જ્યારે મહિલા શ્રેણીમાં પૂર્વ સ્પ્રિન્ટર અશ્વિની નાચપ્પા, આર્ચર ચેક્રોવોલુ સ્વુરો, શટલર તૃપ્તિ મુર્ગુંંદે, વેઇટલિફ્ટર નીલમ સેટ્ટી લક્ષ્મી અને કનોઇસ્ટ રગીના કિરોએ ઉમેદવારી પાછી ખેંચી છે.

ચૂંટાયેલા આ આઠ SOM (૪ પુરુષ અને ૪ મહિલા) IOA જનરલ એસેમ્બલીના સભ્યો બનશે, જેનાથી તેઓ ૫ ડિસેમ્બરે યોજાનારી એક્ઝિક્યુટિવ કાઉન્સિલની ચૂંટણીમાં મતદાન કરવા અને ઉમેદવારી નોંધાવવા માટે પાત્ર બનશે. આ ઉપરાંત, બે SOM (એક પુરુષ અને એક મહિલા) IOA એક્ઝિક્યુટિવ કાઉન્સિલમાં પણ ચૂંટાશે.

આ દરમિયાન, ક્લીન સ્પોર્ટ્સ ઇન્ડિયાના પૂર્વ નેશનલ કન્વીનર બી.વી.પી. રાવે એવો આક્ષેપ કર્યો હતો કે કેટલાક ઉમેદવારોએ રમતગમત મંત્રાલયના દબાણ હેઠળ નામ પાછું ખેંચ્યું છે. જોકે, મંત્રાલયના એક સ્ત્રોતે આ આરોપોને નકારી કાઢ્યા હતા અને જણાવ્યું હતું કે સરકારનો IOA ની ચૂંટણી પ્રક્રિયામાં કોઈ હસ્તક્ષેપ કે ભૂમિકા નથી.