ફ્લાઇટ રદ કરવા બદલ વેન્ચુરા એર કનેક્ટને ગ્રાહક આયોગનો દંડ

ગુજરાત સ્ટેટ કન્ઝ્યુમર ડિસ્પ્યુટ્સ રિડ્રેસલ કમિશને વેન્ચુરા એર કનેક્ટ લિમિટેડ સામે એક મહત્વનો ચુકાદો આપ્યો છે. આ કમિશને વિમાનનું ટાયર પંચર થવાને કારણે ફ્લાઇટ રદ કરવાના મામલે એરલાઇનને સેવાઓમાં ખામી માટે જવાબદાર ઠેરવી છે. આ મામલે એરલાઇનને એક મુસાફરને વળતર અને ખર્ચ પેટે કુલ ₹ ૬૯,૦૦૦ ચૂકવવાનો આદેશ આપવામાં આવ્યો છે, જેમાં રાજ્ય કમિશન દ્વારા લાદવામાં આવેલો વધારાનો ₹ ૧૦,૦૦૦નો દંડ પણ સામેલ છે.

આ કેસની વિગતો અનુસાર, પ્રભાવિત મુસાફરે ૨જી ઓક્ટોબર, ૨૦૨૩ના રોજ અમરેલીથી સુરત માટેની ફ્લાઇટ VA-૭૦૨માં બે ટિકિટો બુક કરાવી હતી. પરંતુ ફ્લાઇટ રદ થવાને કારણે મુસાફરને મુશ્કેલીનો સામનો કરવો પડ્યો હતો. આ ઘટના બાદ એરલાઇન અને મુસાફર વચ્ચે બોલાચાલી અને તકરાર થઈ હતી, જેના પગલે એરલાઇને તે મુસાફરનું નામ બ્લેકલિસ્ટમાં નાખી દીધું હતું. ગ્રાહક આયોગે આ મામલે કડક વલણ અપનાવતા એરલાઇનને આદેશ આપ્યો છે કે તે મુસાફરનું નામ બ્લેકલિસ્ટમાંથી તુરંત દૂર કરે.

આ સમગ્ર મામલે સુનાવણી દરમિયાન સામે આવ્યું હતું કે ઘટના સમયે એરલાઇન પાસે માત્ર એક જ વિમાન કાર્યરત હતું. એરલાઇનના કુલ ત્રણ વિમાનોમાંથી બે વિમાનો તે સમયે જાળવણી (મેન્ટેનન્સ) હેઠળ હતા, જેના કારણે ફ્લાઇટ રદ કરવાની નોબત આવી હતી. આમ છતાં, ગ્રાહક સુરક્ષા ફોરમે સેવાઓમાં ખામી ગણીને મુસાફરને ન્યાય અપાવ્યો છે.