DRDO દ્વારા ઓડિસાના ચાંદીપુર ખાતે પ્રલય ક્વાસી બેલેસ્ટિક મિસાઈલનું સફળ પરીક્ષણ

દૈનિક ભાસ્કરના અહેવાલ મુજબ, ડીઆરડીઓ દ્વારા મંગળવારના રોજ ઓડિસાના ચાંદીપુર સ્થિત આઇટીઆર તેમજ ડૉ. એપીજે અબ્દુલ કલામ આઇલેન્ડ પરથી પ્રલય મિસાઈલનું સફળ પરીક્ષણ કરવામાં આવ્યું છે. આ એક ક્વાસી બેલેસ્ટિક મિસાઈલ છે, જેને ડીઆરડીઓ દ્વારા તૈયાર કરવામાં આવી છે. આ મિસાઈલ ૫૦૦ કિલોમીટર સુધીની દૂરી પર અલગ-અલગ લક્ષ્યો વિરુદ્ધ વિવિધ પ્રકારના વોરહેડ લઈ જવાની પૂરી ક્ષમતા ધરાવે છે.

પરીક્ષણ કરવામાં આવે તે પહેલાં ૫૯૫ કિલોમીટરના ઘેરાવા માટે નોટમ એટલે કે એનઓટીએમ જારી કરવામાં આવ્યું હતું. આ ઉપરાંત ટેસ્ટ રેન્જની ૨ કિલોમીટરની હદમાં રહેતા લોકોને પણ ત્યાંથી સુરક્ષિત રીતે હટાવવામાં આવ્યા હતા. સામાન્ય બેલેસ્ટિક મિસાઈલ સીધી ઉપર જઈને નીચે આવે છે અને તેનો રસ્તો પહેલેથી જ જાણી શકાતો હોય છે, જ્યારે પ્રલય મિસાઈલ લો-ટ્રેજેક્ટરી પર ગતિ કરે છે અને રસ્તામાં જ પોતાની દિશા બદલી શકે છે તેમજ ટર્મિનલ ફેઝમાં મેન્યુવર પણ કરી શકે છે. આ ખાસિયતને કારણે દુશ્મન દેશની એર ડિફેન્સ સિસ્ટમ આ મિસાઈલને ઇન્ટરસેપ્ટ કરી શકતી નથી.

આ ઘાતક કન્વેશનલ મિસાઈલને સેના અને એરફોર્સ બંનેમાં સામેલ કરવાની યોજના છે. પાકિસ્તાન સાથેની એલઓસી પર આ પ્રકારના શોર્ટ રેન્જ અને હાઈ પ્રિસિઝન હથિયારો ગેમ-ચેન્જર સાબિત થઈ રહ્યા છે. સેના દ્વારા ખાસ કરીને પશ્ચિમી અને ઉત્તરીય બોર્ડર માટે આની માંગ કરવામાં આવી હતી. ડીએસી દ્વારા ૧૨૦ મિસાઈલોની ખરીદી માટે મંજૂરીની લીલીઝંડી આપવામાં આવી ચૂકી છે. આગામી સમયમાં તેને નવી રોકેટ ફોર્સમાં સામેલ કરવામાં આવશે, જેનું મુખ્ય કામ દુશ્મનના એરબેઝ, ફ્યુલ ડિપો અને કમાન્ડ સેન્ટરને શરૂઆતની ૩૦ મિનિટમાં જ નેસ્તનાબૂદ કરવાનું રહેશે.

સૂત્રોના જણાવ્યા અનુસાર, પ્રલય મિસાઈલની સફળતા બાદ હવે તેના એરફોર્સ વર્ઝન એટલે કે પ્રલય-એએલબીએમ અને લાંબી રેન્જ ધરાવતી પ્રલય-૨ પર પણ કામ ચાલી રહ્યું છે. અહેવાલો મુજબ, આ પરીક્ષણના એક દિવસ અગાઉ જ ડીઆરડીઓ દ્વારા આજ રેન્જથી વીશોરાડ્સ એટલે કે વેરી શોર્ટ રેન્જ એર ડિફેન્સના ૩ સફળ પરીક્ષણ કરવામાં આવ્યા હતા, જે ૬ કિલોમીટર દૂર રહેલા ડ્રોન અને હેલિકોપ્ટરને તોડી પાડવા સક્ષમ છે.

આ ઉપરાંત, ભારતે ઓડિસાના ચાંદીપુર સ્થિત ઇન્ટિગ્રેટેડ ટેસ્ટ રેન્જ પરથી બેલેસ્ટિક મિસાઈલ અગ્નિ-૪નું પણ સફળ પરીક્ષણ કર્યું છે. રક્ષા મંત્રાલય દ્વારા આપવામાં આવેલી માહિતી મુજબ, આ મિસાઈલના તમામ ઓપરેશનલ અને ટેકનિકલ પેરામીટર્સની ચકાસણી કરવામાં આવી હતી, જે સંપૂર્ણપણે સફળ રહી હતી. આ પરીક્ષણ સ્ટ્રેટેજિક ફોર્સેસ કમાન્ડની દેખરેખ હેઠળ હાથ ધરવામાં આવ્યું હતું. આ મિસાઈલમાં અત્યાધુનિક એવિયોનિક્સ અને ડિજિટલ કંટ્રોલ સિસ્ટમ લગાવવામાં આવી છે, જેની મદદથી તે ઉચ્ચ ચોકસાઈ સાથે ૪૦૦૦ કિલોમીટરની રેન્જ સુધી સચોટ નિશાન તાકી શકે છે. આ મિસાઈલ ભારતમાં જ નિર્મિત એક મિડિયમ-રેન્જ બેલેસ્ટિક મિસાઈલ છે.