પાર્કિંગ વિવાદમાં પડોશીએ ટેક એક્ઝિક્યુટિવ પર ૧૫ રાઉન્ડ ફાયરિંગ કર્યું, ૯ ગોળીઓ વાગતા મોત

હરિયાણાના ફરીદાબાદમાં પાર્કિંગના સામાન્ય વિવાદે ભયાનક રૂપ ધારણ કર્યું હતું, જેમાં એક પડોશીએ બીજા પડોશી પર અંધાધૂંધ ગોળીબાર કરી તેમની હત્યા કરી નાખી હતી. આ ઘટનામાં મૃતક પરમજીત ધનખર, જે એક સિનિયર ટેક બિઝનેસ એક્ઝિક્યુટિવ હતા, તેમને તેમના જ પડોશીએ લાયસન્સવાળી પિસ્તોલથી કુલ ૧૫ રાઉન્ડ ફાયરિંગ કર્યું હતું. પોલીસના જણાવ્યા અનુસાર, આ ગોળીબારમાં પરમજીત ધનખરના શરીર પર ૯ ગોળીઓ વાગી હતી, જેના કારણે તેમનું ઘટનાસ્થળે જ મોત નીપજ્યું હતું.

એનડીટીવીના અહેવાલ મુજબ, આ સમગ્ર ઘટના શુક્રવારની રાત્રે ફરીદાબાદના સેક્ટર ૨૧સીમાં આવેલી એક મલ્ટી-સ્ટોરી બિલ્ડિંગમાં બની હતી. પરમજીત ધનખર આ બિલ્ડિંગના ઘર નંબર ૬૪૧ના પ્રથમ માળે તેમની પત્ની, પુત્ર અને પુત્રી સાથે રહેતા હતા. તેઓ મૂળ હિસારના વતની હતા પરંતુ કામકાજ અર્થે સિંગાપોરમાં રહેતા હતા. તેઓ ૨૪ નવેમ્બરે યોજાનારા તેમના ભત્રીજાના લગ્નમાં હાજરી આપવા માટે માત્ર બે દિવસ પહેલા જ સિંગાપોરથી ફરીદાબાદ પરત ફર્યા હતા.

ઘટનાની વિગતો આપતા સુરજકુંડ સ્ટેશન હાઉસ ઓફિસર (SHO) પ્રહલાદ કુમારે પત્રકારોને જણાવ્યું હતું કે, પરમજીત ધનખર રાત્રે લગભગ ૮ વાગ્યે જીમથી ઘરે પરત ફર્યા હતા. જ્યારે તેઓ બિલ્ડિંગના પાર્કિંગ વિસ્તારમાં પહોંચ્યા, ત્યારે તેમણે જોયું કે તેમની નિયુક્ત પાર્કિંગ જગ્યા પર મોહન ઉર્ફે મોનુ શર્માની કાર પાર્ક કરેલી હતી. મોનુ શર્મા આ જ બિલ્ડિંગના ત્રીજા માળે રહેતા હતા. પરમજીતે મોનુ શર્માને તેમની કાર ત્યાંથી હટાવવા માટે કહ્યું હતું, જેનાથી બંને વચ્ચે ઉગ્ર દલીલો શરૂ થઈ હતી.

જેમ જેમ દલીલો વધી, તેમ મોનુ શર્માએ પોતાની લાયસન્સવાળી પિસ્તોલ કાઢી અને પરમજીત પર ગોળીબાર શરૂ કર્યો હતો. પોલીસના જણાવ્યા અનુસાર, મોનુએ કુલ ૧૫ રાઉન્ડ ફાયરિંગ કર્યું હતું, જેમાં પરમજીતને ૯ ગોળીઓ વાગી હતી. ગોળીબાર કર્યા બાદ આરોપી મોહન ઉર્ફે મોનુ શર્મા પોતાના પરિવાર સાથે ઘટનાસ્થળેથી ફરાર થઈ ગયો હતો.

તપાસ દરમિયાન પોલીસને જાણવા મળ્યું છે કે આ બંને પરિવારો વચ્ચે છેલ્લા કેટલાક દિવસોથી મતભેદો ચાલી રહ્યા હતા. વિવાદ માત્ર પાર્કિંગ પૂરતો સીમિત નહોતો, પરંતુ પાલતુ કૂતરાને લઈને પણ બંને પક્ષો વચ્ચે ખેંચતાણ હતી. પોલીસના જણાવ્યા અનુસાર, મોનુ શર્માનો પુત્ર નિયમિતપણે તેના પાલતુ કૂતરાને પાર્કિંગ વિસ્તારમાં શૌચક્રિયા માટે લઈ જતો હતો. પરમજીત ધનખરના પુત્ર સૂર્યાએ આ બાબતે અનેકવાર વાંધો ઉઠાવ્યો હતો. આ મુદ્દે ગોળીબારના ૪ થી ૫ દિવસ પહેલા પણ બંને પક્ષો વચ્ચે દલીલો થઈ હતી, જોકે તે સમયે પરિસ્થિતિ શાંત થઈ ગઈ હતી.

ઘટનાની જાણ થતા જ પોલીસ, ક્રાઈમ બ્રાંચના કર્મચારીઓ અને ફોરેન્સિક સાયન્સ લેબોરેટરીની ટીમ ઘટનાસ્થળે પહોંચી હતી. તપાસ દરમિયાન પોલીસને પાર્કિંગ વિસ્તારમાંથી અનેક ખાલી કારતુસના ખોખા મળી આવ્યા હતા. પોલીસ હાલમાં ફરાર આરોપી અને તેના પરિવારની શોધખોળ કરી રહી છે.

પરમજીત ધનખર એક ઉચ્ચકક્ષાના વ્યાવસાયિક હતા. તેઓ ભારતીય આઈટી દિગ્ગજ ટેક મહિન્દ્રાના એશિયા ઓપરેશન્સના વડા રહી ચૂક્યા હતા અને હાલમાં તેઓ વિયેતનામ સ્થિત એક કંપનીમાં કાર્યરત હતા.