૮૦,૦૦૦ કરોડના સટ્ટા કૌભાંડમાં ઓમાનથી મુખ્ય આરોપી સૌરભ ચંદ્રકર ભારત લાવવામાં આવ્યો

૮૦,૦૦૦ કરોડ રૂપિયાના વિશાળ સટ્ટા કૌભાંડ સાથે જોડાયેલા મહાદેવ ઓનલાઇન સટ્ટા એપના મુખ્ય પ્રમોટર સૌરભ ચંદ્રકરને સીબીઆઈએ ઓમાનમાંથી પકડી ભારત લાવવામાં સફળતા મેળવી છે. દૈનિક ભાસ્કરના અહેવાલ મુજબ, સીબીઆઈની ટીમે અન્ય કેન્દ્રીય એજન્સીઓ સાથે મળીને ઓમાનમાં તેની ધરપકડ કરી હતી અને હવે તેને રાયપુરની સ્પેશિયલ સીબીઆઈ કોર્ટમાં રજૂ કરવામાં આવશે.

સીબીઆઈના જણાવ્યા અનુસાર, સૌરભ ચંદ્રકર વિરુદ્ધ રેડ કોર્નર નોટિસ જારી કરવામાં આવી હતી, જેના આધારે ઓમાનની રોયલ પોલીસે તેને પકડી પાડ્યો હતો. ત્યારબાદ સીબીઆઈ અને ઈડીએ ભારત સરકારના માધ્યમથી સૌરભના પ્રત્યાર્પણ માટે ઓમાનને ઔપચારિક પ્રસ્તાવ મોકલ્યો હતો. આ પ્રસ્તાવમાં આરોપી વિરુદ્ધ એકત્રિત કરવામાં આવેલા પુરાવાઓ પણ સામેલ કરવામાં આવ્યા હતા. ભારત સરકારની એજન્સીઓ, ઈન્ટરપોલ અને ઓમાનના અધિકારીઓ વચ્ચે થયેલી વાતચીત બાદ તેના પ્રત્યાર્પણને મંજૂરી મળી હતી. આ પ્રક્રિયા પૂર્ણ થયા બાદ સીબીઆઈની ટીમ મસ્કાટ પહોંચી હતી અને સૌરભને ભારત લાવવામાં આવી હતી.

મહાદેવ સટ્ટા એપ સાથે જોડાયેલા વિવિધ કેસોની તપાસ સીબીઆઈ કરી રહી છે. છત્તીસગઢ સરકારે આ મામલે સંબંધિત ૧૩ એફઆઈઆર તપાસ માટે સીબીઆઈને સોંપી હતી. આ ઉપરાંત, ઈડીના કેસમાં પણ તેની સામે પ્રોસિક્યુશન કમ્પ્લેન્ટ દાખલ કરવામાં આવી છે. સીબીઆઈની તપાસમાં બહાર આવ્યું છે કે મહાદેવ ઓનલાઇન બુક દેશના મોટા ગેરકાયદેસર ઓનલાઇન સટ્ટાના નેટવર્કનો ભાગ હતું, જેનું સંચાલન ભારતની બહારથી કરવામાં આવતું હતું. આ પ્લેટફોર્મ દ્વારા ક્રિકેટ, ફૂટબોલ, તાશ અને અન્ય રમતો પર ઓનલાઇન સટ્ટો લગાવવામાં આવતો હતો.

આ નેટવર્કને ચલાવવા માટે દેશભરમાં ફ્રેન્ચાઇઝીની જેમ પેનલ અને બ્રાન્ચ બનાવવામાં આવી હતી. આ બ્રાન્ચો દ્વારા લોકોને સટ્ટા સાથે જોડવામાં આવતા હતા અને તેમની પાસેથી નાણાં જમા કરાવવામાં આવતા હતા. તપાસ એજન્સીના જણાવ્યા મુજબ, સટ્ટાબાજીમાંથી મળતી રકમ અનેક બેંક ખાતાઓમાં જમા કરવામાં આવતી હતી. આ ખાતાઓ દ્વારા અલગ-અલગ વ્યવહારો કરીને નાણાં છુપાવવામાં આવતા હતા અને ત્યારબાદ હવાલાના માધ્યમથી વિદેશ મોકલવામાં આવતા હતા. સીબીઆઈની તપાસમાં એ પણ સામે આવ્યું છે કે આ નેટવર્કને કોઈપણ અવરોધ વગર ચલાવવા માટે સરકારી કર્મચારીઓને લાંચ આપવામાં આવતી હતી.

સીબીઆઈએ આ મામલે ભ્રષ્ટાચાર નિવારણ અધિનિયમ, આઈપીસીની ગુનાહિત કાવતરું, છેતરપિંડી અને જાળસાની કલમો તેમજ છત્તીસગઢ જુગાર (પ્રતિબંધ) અધિનિયમ હેઠળ ચાર્જશીટ દાખલ કરી છે. બીજી તરફ, ઈડીએ ભારત અને વિદેશમાં અનેક મિલકતો જપ્ત કરી છે. સીબીઆઈના જણાવ્યા અનુસાર, ભારત પહોંચ્યા બાદ સૌરભ ચંદ્રકરનું મેડિકલ પરીક્ષણ કરવામાં આવશે. ત્યારબાદ ટ્રાન્ઝિટ રિમાન્ડ લઈને તેને રાયપુર લઈ જવામાં આવશે. ૨ નવેમ્બરના રોજ તેને રાયપુરની વિશેષ સીબીઆઈ અદાલતમાં રજૂ કરવામાં આવશે.

આ દરમિયાન, સૌરભ ચંદ્રકરના એક નકલી ઇન્ડોનેશિયન પાસપોર્ટનો મુદ્દો પણ સામે આવ્યો છે. દૈનિક ભાસ્કરના અહેવાલ મુજબ, સૌરભ ચંદ્રકર પર આરોપ છે કે તેણે નકલી ઇન્ડોનેશિયન પાસપોર્ટ દ્વારા ઓમાનમાં પ્રવેશ મેળવ્યો હતો. પ્રત્યાર્પણની પ્રક્રિયા દરમિયાન દૈનિક ભાસ્કરના હાથમાં તેના કથિત નકલી પાસપોર્ટના ફોટા અને દસ્તાવેજો લાગ્યા છે. આ પાસપોર્ટમાં ફોટો તેનો પોતાનો છે, પરંતુ નામ શ્રીલંકન ક્રિકેટરનું છે અને જન્મ તારીખ પણ અલગ છે.