બનાસકાંઠામાં પશુપાલન ક્ષેત્રે નવી ક્રાંતિ લાવવા વડાપ્રધાન મોદી પધારી રહ્યા છે

ગુજરાતમાં ખેતી બાદ પશુપાલન ક્ષેત્રે ક્રાંતિ લાવવાની દિશામાં એક મોટું પગલું ભરવામાં આવી રહ્યું છે. વડાપ્રધાન નરેન્દ્ર મોદી બનાસકાંઠાના ભીલડી ખાતે પશુપાલકોને મોટી ભેટ આપવા જઈ રહ્યા છે. આ મુલાકાત દરમિયાન વડાપ્રધાનના હસ્તે ₹૪૦૭.૫૬ કરોડના ત્રણ વિકાસકાર્યોનું લોકાર્પણ અને ખાતમુહૂર્ત કરવામાં આવશે. આ પ્રોજેક્ટ્સ પૈકી ૧૨૭ એકર જમીનમાં ₹૩૨૪.૭૭ કરોડના ખર્ચે તૈયાર કરવામાં આવેલું અત્યાધુનિક પશુ સંવર્ધન કેન્દ્ર પશુપાલકો માટે આશીર્વાદરૂપ સાબિત થશે તેવી આશા વ્યક્ત કરવામાં આવી રહી છે.

વડાપ્રધાન મોદીએ પોતાની ગુજરાત મુલાકાતના આગલા દિવસે સોશિયલ મીડિયા પ્લેટફોર્મ 'X' પર એક ખાસ પોસ્ટ શેર કરીને આ ઐતિહાસિક ક્ષણનું મહત્વ સમજાવ્યું છે. તેમણે જણાવ્યું છે કે બનાસકાંઠામાં પશુપાલન ક્ષેત્રે એક નવી ક્રાંતિ જોવા મળશે અને આ ક્ષણના સાક્ષી બનવા માટે તેમણે સૌને બનાસકાંઠા આવવાનું ખુલ્લું આમંત્રણ આપ્યું છે. ૧૨૭ એકરના વિશાળ વિસ્તારમાં નિર્મિત આ 'બોવાઇન બ્રીડિંગ એન્ડ રિસર્ચ સેન્ટર' પશુપાલન અને ડેરી ઉદ્યોગ માટે સીમાચિહ્નરૂપ સાબિત થશે. આ કેન્દ્રનો મુખ્ય ઉદ્દેશ પશુ દીઠ દૂધ ઉત્પાદનમાં વધારો કરવાનો અને ઉત્તમ ઓલાદના સંવર્ધન પર વિશેષ ભાર મૂકવાનો છે.

આ રિસર્ચ સેન્ટર શરૂ થવાથી કાંકરેજ જેવી ગૌરવવંતી દેશી ગૌવંશની ઓલાદોનું સંરક્ષણ અને સંવર્ધનને મોટું પ્રોત્સાહન મળશે. આધુનિક વિજ્ઞાન અને સંશોધનની મદદથી પશુઓની નસ્લ સુધારવામાં આવશે, જેનાથી પશુપાલકોને લાંબા ગાળે લાભ મળી શકે છે. વડાપ્રધાન મોદીએ પોતાની પોસ્ટમાં વધુમાં જણાવ્યું છે કે આ અભિનવ પહેલથી માત્ર બનાસકાંઠા કે ગુજરાત જ નહીં, પરંતુ સમગ્ર દેશભરના પશુપાલકોની આર્થિક સ્થિતિ સુધારવામાં અને તેમની આવક બમણી કરવામાં મોટી મદદ મળશે. આનાથી પશુપાલન સાથે જોડાયેલા લાખો ખેડૂતો અને માલધારીઓને ફાયદો થશે.

આ સમગ્ર પ્રોજેક્ટ સાથે સંકળાયેલા બનાસ ડેરીના ચેરમેન શંકર ચૌધરીએ TV9 સાથેની વાતચીતમાં જણાવ્યું હતું કે, આ વડાપ્રધાન મોદીનું વિઝન હતું. તેમણે યાદ અપાવ્યું કે ૩ વર્ષ અગાઉ બ્રાઝિલના ઉપરાષ્ટ્રપતિની હાજરીમાં યોજાયેલા કાર્યક્રમ બાદ તેમણે વિચાર્યું હતું કે જો બ્રાઝિલ આવી ક્રાંતિ કરી શકે તો ભારત શા માટે નહીં? ત્યારબાદ લેબને લેન્ડ સુધી પહોંચાડવાની કવાયત શરૂ કરવામાં આવી હતી.

આ કેન્દ્રમાં ઇનવિટ્રો ફર્ટિલાઇઝેશન એટલે કે IVF પદ્ધતિનો ઉપયોગ કરવામાં આવશે. આ પદ્ધતિનો સૌથી મોટો ફાયદો એ છે કે ઉત્તમ આનુવંશિક ગુણવત્તા ધરાવતી ગાયોની વસતી ઝડપથી વધારી શકાય છે. સામાન્ય રીતે ગાયમાંથી વર્ષે એક વાછરડું મળે છે, પરંતુ IVF ટેક્નોલોજી દ્વારા યોગ્ય પરિસ્થિતિમાં એક ઉત્તમ ગાયમાંથી વર્ષે આશરે ૨૦ જેટલા વાછરડાં મેળવવાની સંભાવના છે. આ લેબમાં OPU-IVF અને એમ્બેર્યો ટ્રાન્સફર એટલે કે ટેસ્ટટ્યૂબનો ઉપયોગ કરીને શ્રેષ્ઠ ગાયમાંથી વર્ષે ૧૦ થી ૨૦ ગર્ભ કાઢીને તેને લેબમાં પ્રોસેસ કરીને બીજી ગાયોમાં મૂકવામાં આવશે. આ પ્રક્રિયા દ્વારા જન્મેલી ગાયોની ઓલાદ વધુ દૂધ આપશે.